ព្រឹកថ្ងៃច័ន្ទ១រោច ខែស្រាពណ៍ ឆ្នាំច សំរឹទ្ឋិស័ក ព.ស ២៥៦២ ត្រូវនឹងថ្ងៃទី២៧ ខែសីហា ឆ្នាំ២០១៨ មន្ទីរផែនការខេត្តប៉ៃលិន សហការជាមួយអគ្គនាយកវិទ្យាស្ថានជាតិស្ថិតិ ក្រសួងផែនការ បានបើកវគ្គបណ្តុះបណ្តាលស្តីពីស្ថិតិគណនេយ្យជាតិ និងសន្ទស្សន៍ថ្លៃទំនិញប្រើប្រាស់ថ្នាក់ខេត្ត ក្រោមអធិបតីភាពឯកឧត្តម ទុយ ចំរើន អនុរដ្ឋលេខាធិការក្រសួងផែនការ និងមានការអញ្ជើញពីសំណាក់ឯកឧត្តម ហែម រីទ្ធី អភិបាលរងខេត្តប៉ៃលិន ព្រមទាំងលោក-លោកស្រីប្រធាន អនុប្រធានមន្ទីរ មន្រ្តីរាជការពាក់ព័ន្ធជាច្រើនទៀតផងដែរ។
ឯកឧត្តម ហែម រីទ្ធី អភិបាលរងខេត្តបានអោយដឹងថា៖ ខេត្តប៉ៃលិនមានអំណោយផលធម្មជាតិយ៉ាងសំខាន់ដល់ដំណាំកសិកម្ម និងកសិឧស្សាហកម្ម ដែលប្រជាពលរដ្ឋប្រកបមុខរបបកសិកម្មជាចម្បងមានចំនួន៦៩.៩% និងប្រកបមុខរបបសិប្បកម្ម និងសេវាកម្មមានចំនួន៣០.១% ។ ឯកឧត្តមបានបន្តថា៖ ដោយអនុវត្តន៍តាមយុទ្ធសាស្រ្តចតុកោណរបស់រាជរដ្ឋាភិបាលក្នុងការកាត់បន្ថយភាពក្រីក្រ និងការយកចិត្តទុកដាក់របស់អាជ្ញាធរគ្រប់ជាន់ថ្នាក់ មន្ទីរអង្គភាព និងដៃគូអភិវឌ្ឍន៍ទាំងអស់ បានសម្រេចនូវការកាត់បន្ថយភាពក្រីក្រជូនប្រជាពលរដ្ឋជាបន្តបន្ទាប់។ ឯកឧត្តមបានបន្តថា ការរៀបចំវគ្គបណ្តុះបណ្តាល (ការគណនាផលិតផលក្នុងស្រុកសរុបGDPនិងការគណនាសន្ទស្សន៍ថ្លៃទំនិញប្រើប្រាស់CPI) ដ៏មានសារៈសំខាន់នេះ នឹងធ្វើអោយខេត្តមានចំណេះ ធនធាន មធ្យោបាយក្នុងការវាស់វែងអំពីកំរិតនៃការរីកចម្រើនរបស់ខេត្ត និងសម្រាប់គៀងគរវិនិយោគិននានា មកដាក់ទុនវិន្និយោគក្នុងខេត្តប៉ៃលិន។ ឯកឧត្តមបានមានប្រសាសន៍បន្តថា៖ កន្លងមកខេត្តប៉ៃលិន គឺមិនធ្លាប់មានការគណនាផលិតផលក្នុងស្រុកសរុប(GDP)ថ្នាក់ខេត្តនោះទេ ទើបតែពេលនេះយើងមានវគ្គបណ្តុះបណ្តាលការគណនា(GDP)នេះ ហើយនៅពេលខាងមុខខេត្តប៉ៃលិន នឹងមានទិន្ន័យ(GDP)របស់ខេត្ត សម្រាប់បង្ហាញដល់ភ្ញៀវ ជាតិ អន្តរជាតិ និងអ្នកពាក់ព័ន្ធ ជាពិសេសអ្នកវិនិយោគដែលមានបំណងចង់ធ្វើការវិនិយោគក្នុងខេត្តប៉ៃលិន។
ឯកឧត្តម ទុយ ចំរើន អនុរដ្ឋលេខាធិការក្រសួងផែនការបានមានប្រសាសន៍ថា៖ រាជរដ្ឋាភិបាលកម្ពុជា បានអនុវត្តន៍ជោគជ័យនូវយុទ្ធសាស្រ្តចតុកោណដំណាក់កាលទី៣ គឺរក្សាស្ថេរភាពម៉ាក្រូសេដ្ឋកិច្ច និងនិរន្តរភាពកំណើនសេដ្ឋកិច្ចជាតិក្នុងវង្វង់៧,០% ហើយលទ្ធផលក្នុងរយៈពេល១០ឆ្នាំកន្លងមក សេដ្ឋកិច្ចជាតិកម្ពុជាមានកំណើនជាមធ្យម៧,៧% ដែលជាកំណើនខ្ពស់ក្នុងបណ្តាប្រទេសក្នុងតំបន់ ដែលត្រូវបានដៃគូរអភិវឌ្ឍន៍ដូចជា៖ ធនាគារពិភពលោក ធនាគារអភិវិឌ្ឍន៍អាស៊ី មូលនិធិរូបិយវត្ថុអន្តរជាតិ បានវាយតម្លៃខ្ពស់និងកោតសសើរ។ ឯកឧត្តមបានបន្តថា រាជរដ្ឋាភិបាលក៏បានរក្សាស្ថេរភាពអតិផរណាក្នុងកំរិតក្រោម៥,០% ដែលជាលក្ខខណ្ឌធានា ស្ថេរភាពម៉ាក្រូសេដ្ឋកិច្ច និងនិរន្តរភាពកំណើនសេដ្ឋកិច្ច ជាពិសេសខេត្តប៉ៃលិនមានសក្តានុពលរួមចំណែកក្នុងការជំរុញកំណើនសេដ្ឋកិច្ចជាតិផងដែរ។ ឯកឧត្តមបានបន្តថា៖ រាជរដ្ឋាភិបាលកម្ពុជាក្រោមការដឹកនាំដ៏ឈ្លាសវៃរបស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានយកចិត្តទុកដាក់ខ្ពស់ក្នុងការអភិវិឌ្ឍន៍ ទាំងហេដ្ឋារចនាសម្ព័ន និងការបណ្តុះបណ្តាលធនធានមនុស្ស ដើម្បីអោយថ្នាក់ខេត្ត មានសមត្ថភាពគ្រប់គ្រាន់ក្នុងការអភិវិឌ្ឍន៍ ទាក់ទាញការវិនិយោគ ដើម្បីជំរុញកំណើនសេដ្ឋកិច្ចខេត្ត ពីមួយឆ្នាំទៅមួយឆ្នាំ។ ម្យ៉ាងទៀតដើម្បីធ្វើការវាស់វែងកំណើនសេដ្ឋកិច្ចខេត្ត យើងត្រូវមានស្ថិតិគណនេយ្យជាតិ ដែលធ្វើការគណនាផលិតផលក្នុងស្រុកសរុប( Gross Domestic Product ឬ GDP) ក្នុងមួយឆ្នាំសម្រាប់ខេត្ត។ ឯកឧត្តមបានបន្តទៀតថា៖ គណនេយ្យជាតិ និងសន្ទស្សន៍ថ្លៃទំនិញប្រើប្រាស់មានសារសំខាន់ខ្លាំងណាស់ក្នុងការគណនាអតិផរណាសម្រាប់ខេត្ត។ ការគ្រប់គ្រងអតិផរណាបានក្នុងកម្រិតទាប អាចរក្សាបានស្ថេរភាពជីវភាព ប្រជាជនអោយកាន់តែប្រសើរឡើង ។ ឯកឧត្តមបានសំណូមពរដល់សិក្ខាកាមទាំងអស់ត្រូវយកចិត្តទុកដាក់ស្វែងយល់និងលើកជាសំនួរ សម្រាប់គ្រូបង្គោល ព្រោះថាស្ថិតិគណនេយ្យជាតិជាបន្តុំនៃគណនីសេដ្ឋកិច្ចជាច្រើនក្នុងសេដ្ឋកិច្ចជាតិ មានលក្ខណៈស្មុកស្មាញនិងត្រូវការទិន្ន័យពីប្រភពច្រើនសម្រាម់ចងក្រង។
គួរបញ្ជាក់ថា៖ ការបើកវគ្គបណ្តុះបណ្តាលស្តីពីស្ថិតិគណនេយ្យជាតិ និងសន្ទស្សន៍ថ្លៃទំនិញប្រើប្រាស់ថ្នាក់ខេត្តនេះមានរយៈពេល៣ថ្ងៃគឺចាប់ពីថ្ងៃទី២៧ ខែសីហា ឆ្នាំ២០១៨ រហូតដល់ថ្ងៃទី២៩ ខែសីហា ឆ្នាំ២០១៨ មានសិក្ខាកាមចូលរួមចំនួន៤៥នាក់ ស្រីចំនួន១២នាក់៕ វួច ពឿន
