ថ្ងៃទី១៧ ខែសីហា ឆ្នាំ២០១៨ ឯកឧត្តម ផាន់ ចាន់ធុល អភិបាលខេត្តប៉ៃលិន អមដំណើរដោយ ឯកឧត្តម ហែម ឫទ្ធី អភិបាលរងខេត្ត និងឯកឧត្តម ហុក សុផល អភិបាលរងខេត្ត បានអញ្ជើញជួបសំណេះសំណាលជាមួយថ្នាក់ដឹកនាំ មន្រ្តីរាជការ នៃមន្ទីរសុខាភិបាល ខេត្តប៉ៃលិន ដើម្បីពង្រឹងប្រសិទ្ធភាពការងារ និងការផ្តល់សេវ៉ាសុខាភិបាលជូនដល់ប្រជាពលរដ្ឋ ប្រកបដោយក្រមសីលធម៌ និងវិជ្ជាជីវៈ ជាពិសេសគឺបង្កើនភាពស្និទស្នាលរវាងថ្នាក់ដឹកនាំមន្ទីរជាមួយមន្រ្តីរាជការក្រោមឱវាទ។
នៅក្នុងពីធីសំណេះសំណាលនោះ ឯកឧត្តម ផាន់ ចាន់ធុល អភិបាលខេត្តប៉ៃលិន បានមានប្រសាសន៍ថា៖ ការធ្វើឱ្យប្រជាពលរដ្ឋកាន់តែមានជំនឿជឿជាក់លើវិស័យសុខាភិបាល គឺ ក្រុមគ្រូពេទ្យត្រូវមានការយកចិត្តទុកដាក់ ពិនិត្យព្យាលបាលអ្នកជំងឺ ត្រូវគោរពតាមក្រមសីលធម៌វិជ្ជាជីវៈរបស់គ្រូពេទ្យ ដែលកន្លងមកក៏មានក្រុមគ្រូពេទ្យខ្លះ មានឥរិយាបទមិនសមរម្យទៅលើអ្នកជំងឺ និងទាមទារកសេវាព្យាបាលមុនសិន ទើបព្យាបាលតាមក្រោយ។ ឯកឧត្តម អភិបាលខេត្ត បានមានប្រសាសន៍សង្កត់ធ្ងន់ថា៖ ការកែប្រែសកម្មភាពអវិជ្ជមានទាំងអស់នេះនឹងធ្វើឱ្យការថ្នាំងថ្នាក់របស់ប្រជាពលរដ្ឋមកលើវិស័យសុខាភិបាលនៅក្នុងខេត្ត និងថ្នាក់ដឹកនាំខេត្ត កាន់តែត្រូវកាត់បន្ថយ ។ នៅក្នុងឱកាសនោះផងដែរ ឯកឧត្តម ផាន់ ចាន់ធុល ក៍បានផ្តាំផ្ញើឱ្យមន្ទីរសុខាភិបាលខេត្ត ត្រូវធ្វើយ៉ាងណាផ្សព្វផ្សាយឱ្យបានទូលំទូលាយដល់ប្រជាពលរដ្ឋអំពីការរីកចម្រើន និងការផ្តល់សេវ៉ានានា លើវិស័យសុខាភិបាល ដើម្បីធ្វើយ៉ាងណាឱ្យប្រជាពលរដ្ឋដែលមានបញ្ហាសុខភាពចូលរួមពិគ្រោះពិនិត្យ និងព្យាបាលនៅមន្ទីរពេទ្យរដ្ឋកាន់តែច្រើនឡើងថែមទៀត។
បើតាមរបាយការណ៍របស់ លោក អាង នាង ប្រធានមន្ទីរសុខាភិបាលខេត្តប៉ៃលិន បានឱ្យដឹងថា៖ នៅខេត្តប៉ៃលិន បច្ចុប្បន្នមានមន្ទីរពេទ្យបង្អែកចំនួន ១ និងមណ្ឌលសុខភាពចំនួន ៦ ក្នុងនោះនៅក្រុងប៉ៃលិនចំនួន ៣ នៅស្រុកសាលាក្រៅចំនួន ៣៕ វួច ពឿន
