(07-01-2016) ប៉ៃលិន៖ នៅទីស្នាក់ការគណបក្សប្រជាជនកម្ពុជាខេត្តប៉ៃលិននាព្រឹកថ្ងៃទី៧ ខែមករា ឆ្នាំ ២០១៦បានរៀបចំប្រារព្ធខួបអនុស្សាវរីយ៍ លើកទី៣៧ នៃទិវាជ័យជំនះ ៧មករា ឆ្នាំ១៩៧៩-០៧ មករាឆ្នាំ ២០១៦ ជាថ្ងៃកំណើតទី២ របស់ប្រជាពលរដ្ឋកម្ពុជា ដែលពិធីនេះស្ថិតក្រោមអធិបតីភាព ឯកឧត្តម អ៊ី ឈាន សមាជិកគណកម្មាធិការកណ្តាល និងប្រធានក្រុមការងារចុះជួយខេត្តប៉ៃលិនឯកឧត្តម កើតសុធា ប្រធានគណបក្សប្រជាជនកម្ពុជាខេត្តប៉ៃលិន និង ឯកឧត្តម ឡីចាន់ ឆាយ អនុប្រធានគណបក្សខេត្ត ព្រមទាំងមានការអញ្ជើញ ចូលរួមពីសំណាក់ឯកឧត្តម ប៉ាន់ សូរស័ក្រ ប្រធានក្រុមការងារថ្នាក់ជាតិចុះជួយខេត្ត សមាជិកព្រឹទ្ធសភានិងថ្នាក់ដឹកនាំខេត្ត មន្រ្តីរាជការជុំវិញខេត្ត កងកម្លាំងប្រដាប់អាវុធ លោកគ្រូ អ្នកគ្រូ សិស្សានុសិស្ស និងប្រជាពលរដ្ឋ ជាច្រើននាក់ ។
ឯកឧត្តម កើតសុធា បានអានសុន្ទរកថា សម្តេចអគ្គមហាសេនាបតីតេជោ ហ៊ុនសែន ប្រធានគណបក្សប្រជាជនកម្ពុជាដែលមានខ្លឹមសារជាអាថិថាៈ យើងប្រារព្ធទិវាបុណ្យជ័យជម្នះជាប្រវត្តិសាស្ត្រនេះក្នុងស្មារតីដឹងគុណយ៉ាងជ្រាលជ្រៅចំពោះយុទ្ធជនយុទ្ធនារីអ្នកស្នេហាជាតិដ៏ច្រើនឥតគណនា ដែលបានក្រោកឈរតស៊ូប្រយុទ្ធយ៉ាងប្តូរផ្តាច់ហ៊ានលះបង់សាច់ស្រស់ឈាមស្រស់ និងអាយុជីវិតប្រកបដោយវីរៈភាពដ៏ខ្ពង់ខ្ពស់ក្នុងបុព្វហេតុសង្គ្រោះជាតិ។ យើងទាំងអស់គ្នាសូមលំអោនកាយគោរពវិញ្ញាណក្ខន្ធរបស់ជនរួមជាតិជាង៣លាននាក់ដែលបានបាត់បង់ជីវិតទៅយ៉ាងអយុត្តិធម៌បំផុតនៅក្រោមរបបប្រល័យពូជសាសន៍ និងសូមឧទ្ទិសបួងសួងអោយដូងប្រលឹងរបស់លោកអ្នកទាំងនោះបានទៅកាន់សុគតិភពជារៀងដរាបទៅ។បច្ចុប្បន្ននេះប្រជាជនកម្ពុជាកំពុងរស់នៅយ៉ាងសុដុមរមនាប្រកបដោយក្តីសង្ឃឹមក្រោមពន្លឺនៃសន្តិភាពសេរីភាព និងអភិវឌ្ឍន៍ ប៉ុន្តែសោកនាកម្មឈឺចាប់ខ្លោចផ្សារនិងបាត់បង់យ៉ាងធំធេងក្នុងសម័យអតីតៈកាលដ៏ខ្មៅងងិតនៃសង្គ្រាម និងរបបប្រល័យពូជសាសន៍នៅតែដក់ជាប់ជានិច្ចក្នុងមនសិការរបស់មនុស្សគ្រប់រូបមិនអាចបំភ្លេចបានឡើយ។ជាមួយនិងអំណរសាទរចំពោះសមិទ្ធផលទាំងឡាយដែលបានទទួលក្នុងឆ្នាំ២០១៥ និងប្រកាន់ភ្ជាប់នូវស្មារតី៧មករាដ៏រុងរឿង យើងមានជំនឿមុតមាំថា យើងពិតជានឹងសម្រេចបានសមិទ្ធផលធំៗថ្មីៗថែមទៀតក្នុងការបន្តដោះស្រាយបញ្ហារបស់ជាតិ លើកស្ទួយលិទ្ធិប្រជាធិបតេយ្យ ពង្រឹងនិតិរដ្ឋ និងការអភិវឌ្ឍន៍សេដ្ឋកិច្ចសង្គម បើទោះបីមានការលំបាកនិងបញ្ហាប្រឈមជាច្រើនទៀតក្តី។ក្នុងន័យនេះគណបក្សប្រជាជនកម្ពុជាបន្តជ្រោងទង់មហាសាមគ្គីជាតិ ដើម្បីប្រមូលកម្លាំងជាតិទាំងមូលរួមគ្នាកសាងនិងការពារមាតុភូមិ លុបបំបាត់ទាំងស្រុងនូវទស្សនៈរើសអើង ទឹកឡើងត្រីស៊ីស្រម៉ោចទឹកហោចស្រម៉ោចស៊ីត្រី។
បន្ទាប់ពីតំណាងអង្គមិទ្ទិញបានធ្វើការប្តេជ្ញាចិត្តនិងនៅតែបន្តគាំទ្រទិវាថ្ងៃ៧មករាដែលជាកំណើតទី២របស់ប្រជាជនកម្ពុជារួចមកឯកឧត្តម អ៊ី ឈាន បានមានប្រសាសន៍លើកឡើងថាៈទិវាជ័យជម្នះជាប្រវត្តិសាស្ត្រនាថ្ងៃ៧មករាឆ្នាំ១៩៧៩គឺជាថ្ងៃកំណើតទី២របស់យើង ដែលសង្គ្រោះប្រជាជនយើងអោយរួមផុតពីរបបប្រល័យពូជសាសន៍ និងបានធ្វើអោយប្រទេសជាតិទទួលបាននូវសុខសន្តិភាព មានការអភិវឌ្ឍន៍រីកចំរើនលើគ្រប់វិស័យ អនុវត្តតាមរបបលិទ្ធិប្រជាធិបតេយ្យ មានការបង្រួបបង្រួមជាតិ ។ដូច្នេះថ្នាក់ដឹកនាំ មន្ដ្រីរាជការ កងកម្លាំងប្រដាប់អាវុធនិងបងប្អូនប្រជាពលរដ្ឋទាំងអស់ ត្រូវខិតខំ បំពេញការងារ ទៅតាមតួនាទីរៀងៗខ្លួន ដើម្បីបម្រើ សំណូមពរ និង សេចក្ដីត្រូវ ការជូន ប្រជាពលរដ្ឋ រួមសាមគ្គីគ្នា ការពារសមិទ្ធផលទាំងឡាយ ឲ្យបានស្ថិតស្ថេរគង់វង្ស និង ស្មារតី៧ មករាឲ្យស្ថិតនៅជាអមត។
vv
[youtube id= “s0ISIwn8Ii0”]
