(22-12-2015) ប៉ៃលិន៖ នៅរសៀល ថ្ងៃទី២២ ខែធ្នូ ឆ្នាំ២០១៥ លោកជំទាវ បានស្រីមុំ ប្រធានគណៈកម្មាធិការសាខាកាកបាទក្រហមកម្ពុជាខេត្តប៉ៃលិន បានដឹកនាំសមាជិក សមាជិកាគណៈកម្មាធិការ សាខា អនុគណៈកម្មកាសាខាស្រុកសាលាក្រៅ ព្រមទាំងក្រុមការងារ អ្នកស្មគ្រ័ចិត្តកាកបាទក្រហម លោកអភិបាលស្រុកសាលាក្រៅ លោកមេភូមិ មេឃុំ ចុះសាកសួរសុខទុក្ខ និងប្រគល់ផ្ទះអំណោយសម្តេចកិត្តិព្រឹទ្ធបណ្ឌិត ប៊ុនរ៉ានី ហ៊ុន សែនចំនួន២ខ្នង ជូនប្រជាពលរដ្ឋក្រីក្រក្នុងភូមិអណ្តូងថ្ម ឃុំស្ទឹងកាច់ ស្រុកសាលាក្រៅ ខេត្តប៉ៃលិន ព្រមទាំងផ្តល់អំណោយមនុស្សធម៌ជូនដល់ប្រជាពលរដ្ឋជួបការលំបាកខ្វះខាត៣ភូមិ គឺភូមិអណ្តូងថ្មមានចំនួន៩០គ្រួសារ ភូមិវាលចែងមានចំនួន៦០គ្រួសារ និងភូមិស្រះពីរតាឈានមានចំនួន៥០គ្រួសារផងដែរ។
លោកសូ កង នាយកប្រតិបត្តិសាខាកាកបាទក្រហមកម្ពុជាខេត្តប៉ៃលិនបានអោយដឹងថា៖ផ្ទះអំណោយដ៏ថ្លៃថ្លារបស់សម្តេចកិតិ្តព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា តាមរយៈលោកជំទាវ បានស្រីមុំ ប្រធានគណៈកម្មាធិការសាខាកាកបាទក្រហមកម្ពុជាខេត្តប៉ៃលិន បានបន្តប្រគល់ជូនប្រជាពលរដ្ឋក្រីក្រក្នុងខេត្តប៉ៃលិនមានចំនួន២ខ្នងផ្ទះទៀតហើយ។ ផ្ទះទី១ បានប្រគល់ជូនលោកយាយព្រំ ហុក អាយុ៩០ឆ្នាំ ទីទ័លក្រលំបាក ដែលសព្វថ្ងៃលោកយាយរស់នៅតែជាមួយកូនប្រុសពិកាដៃរកស៊ីធ្វើសំណង់ និងស៊ីឈ្នួលគេ ចិញ្ជឹមដោយលោកយាយតែប៉ុណ្ណោះ ។ ផ្ទះទី២ បានប្រគល់ជូន លោក ខាត់ ជេមអាយុ៤០ឆ្នាំ ដែលមានជីវភាពទីទ័លក្រលំបាក ។ លោក សូ កង បានបញ្ជាក់ថា ទន្ទឹមនឹងទទួលបានផ្ទះ លោកយាយព្រំហុក និងលោកពូខាត់ ជេម ក៏នៅទទួលបានអង្គ៥០គីឡូក្រាម មី១កេះ ត្រីខ១ឡូរ៏ ទឹកត្រី១យួរ ទឹកស៊ីអ៊ីវ១យួ ប្រេងឆា១ដប ប៉ិសចេង១គីឡូ ឆ្នាំងបាយសម្ល២ ខ្ទះឆា១ ចានបាយសម្លរ១២ ស្លាបព្រា១០ វែកបាយសម្លរ២ វែកឆា១ ឃីត២កញ្ចប់(សារុង ក្រមា ភួយ មុង) កន្ទេលជ័រ១ និងថវិកា៦០ម៉ឺនរៀលដែលជាអំណោយរបស់ឯកឧត្តម អ៊ី ឈាន ប្រធានកិត្តិយសសាខាកាកបាទក្រហមកម្ពុជាខេត្តប៉ៃលិនផងដែរ ។ ចំណែកប្រជាពលរដ្ឋចំនួន២០០គ្រួសារមកពីបីភូមិក្នុងឃុំស្ទឹងកាច់ស្រុកសាលាក្រៅ ដែលមានជីវភាពខ្វះខាត ក៏បានទទួលនូវអំណោយពីសាខាកាកបាទក្រហមកម្ពុជាខេត្តប៉ៃលិនផងដែរ ដោយក្នុងមួយគ្រួសាទទួលបានអង្គ២៥គីឡូក្រាម មី១កេះ ត្រីខ១ឡូរ៏ ទឹកត្រី១យួ ប្រេងឆា១ដប ឃីត២កញ្ជប់(សារុង ក្រមា ភួយ មុង) និងថវិការ៣ម៉ឺនរៀល។
ក្នុងពិធីប្រគល់ផ្ទះ និងជួបសំណេះសំណាលជាមួយប្រជាពលរដ្ឋ លោក ជំទាវបានស្រីមុំ ប្រធានគណៈកម្មាធិសាខាកាកបាទក្រហមកម្ពុជាខេត្តប៉ៃលិន បានពាំនាំនូវប្រសាសន៍ផ្តាំផ្ញើសាកសួរសុខទុក្ខពីសំណាក់ សម្តេចកិត្តិព្រឹទ្ធបណ្ឌិតប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ដែលសម្តេចតែងតែបានគិតគូរព្រួយបារម្ភជាប់ជានិច្ចចំពោះសុខទុក្ខ និងការលំបាកក្នុងជីវភាពរស់នៅប្រចាំថ្ងៃរបស់បងប្អូន ប្រជាពលរដ្ឋយើងនៅទូរទាំងប្រទេស ដោយឡែកជាពិសេស គឺប្រជាពលរដ្ឋដែលរស់នៅតាមមូលដ្ឋានជនបទដាច់ឆ្ងាយពីរាជធានី ដូចជាខេត្តប៉ៃលិនជាដើម ។លោកជំទាវបានមានប្រសាសន៍ ៖ ផ្តល់កម្លាំងចិត្តដល់បងប្អូនប្រជាពលរដ្ឋ អោយបន្តខិតខំប្រកបមុខរបររកស៊ីចិញ្ចឹមជីវិតដោយសុច្ចរិត ទៀងត្រង់ខិតខំដាំដុះបង្ករបង្កើនផលអោយអស់លទ្ឋភាព និងសមត្ថភាព ដើម្បីកែប្រែសេដ្ឋកិច្ចជីវភាពក្រុមគ្រួសារខ្លួនអោយល្អប្រសើរឡើង ព្រោះប្រទេសជាតិយើងមានសុខសន្តិភាពពេញលេញបរិបូរណ៏ ដូច្នេះយើងមានឳកាសច្រើនណាស់ ។ លោកជំទាវបានមានប្រសាសន៏ថា ទន្ទឹមនឹងភាពសុខដមរម្យនាក្នុងបរិយាកាសសុខសន្តិភាព សុំកុំអោយបងប្អូនប្រជាពលរដ្ឋយើងភ្លេចខ្លួនអោយសោះ ត្រូវសាមគ្គីគ្នាចូលរួមការងារភូមិឃុំមានសុវត្តិភាព ការពារកុំអោយពួកជនខិលខូចឆក់ឳកាសលួចប្លន់យើងបាន ។ ត្រូវយកចិត្តទុកដាក់ថែទាំសុខភាព ដោយទទួលទានទឹកស្អាតទឹកឆ្អិនម្ហូបអាហារមានអានាម័យ ។ ត្រូវត្រៀមប្រុងប្រយ័ត្នចំពោះគ្រោះមហន្តរាយធម្មជាតិ ជាយថាហេតុជានិច្ច ។ ដើម្បីជាសវាងពីគ្រោះថ្នាក់ចររាចរបាន ក្នុងការធ្វើដំណើរបើកបរយានយន្តត្រូវតែគោរពច្បាប់ចររាចរ ។ សំរាប់យុវជន សុំជាសវាងអោយឆ្ងាយពីគ្រឿងញៀន ត្រូវចាត់ទុកគ្រឿងញៀនជាសត្រូវស្លាប់រស់របស់ជីវិតយុវជនយើង ដើម្បីធានាបាន លោកជំទាវបានសុំអោយមាតាបិតាអាណាព្យាបាល យកចិត្តទុកដាក់តាមដានណែនាំកូនចៅអោយជាប់ជាប្រចាំក្នុងរឿងគ្រឿងញៀននេះ ។ លោកជំទាវបានស្រីមុំ បានបញ្ជាក់ថា ទីណាមានការលំបាក ទីនោះគឺមានកាកបាទក្រហមកម្ពុជា កាកបាទក្រហមកម្ពុជាមិនប្រកាន់ជាតិសាសន៏ មិនប្រកាន់វណ្ណៈ មិនរើសអើងពណ៌សម្បុរនិន្នាការនយោបាយអ្វីទាំងអស់ ប្រជាពលរដ្ឋយើងដែលជួបការលំបាកខ្វះខាត ជួបគ្រោះមហន្តរាយទាំងឡាយ នឹងទទួលបាននូវការយកចិត្តទុកដាក់ឧបត្ថម្ភស្មើៗគ្នា ។
vv
[youtube id= “9d6u-fNkx3c”]
