(14-12-2015) ប៉ៃលិន៖ ល្ងាចថ្ងៃទី១៤ ខែធ្នូ ឆ្នាំ២០១៥នៅសាលាខេត្តប៉ៃលិនមានរៀបចំកិច្ច ប្រជុំស្តីពីការផ្សព្វផ្សាយនិងការចុះប្រមូលទិន្នន័យលើការប្រើប្រាស់ក្របខណ្ឌមន្រ្តីរាជការជាគ្រូបង្រៀននិងផ្នែករដ្ឋបាលគ្រូបង្រៀនជាប់កិច្ចសន្យានៅខេត្តប៉ៃលិន ក្រោមអធិបតីភាព ឯកឧត្តម ឈឿន ប៊ុណ្ណារ័ត្ន អនុរដ្ឋលេខាធិការក្រសួងមុខងារសាធារណៈនិងជាប្រធានក្រុមការងារចុះប្រមូលទិន្នន័យលើការប្រើប្រាស់ក្របខណ្ឌមន្រ្តីរាជការជាគ្រូបង្រៀននិងផ្នែករដ្ឋបាលគ្រូបង្រៀនជាប់កិច្ចសន្យា ឯកឧត្តម ធូ ភា អភិបាលរងខេត្តប៉ៃលិន និងមានការអញ្ជើញចូលរួមពីសំណាក់លោកលោកស្រីប្រធានអនុប្រធានមន្ទីរស្ថាប័នជំវិញខេត្ត លោកលោកស្រីជានាយកនាយករងសាលាមកពីក្រុង/ស្រុក ឃុំ/សង្កាត់ ជាច្រើននាក់ផងដែរ។
បន្ទាប់ពីលោក សាអាត វន្ឍនា អនុប្រធាននាយកដ្ឋានគ្រប់គ្រងបុគ្គលិកក្រសួងមុខងារសាធារណៈបានធ្វើបទបង្ហាញស្តីពីការបំពេញទិន្នន័យលើការប្រើប្រាស់ក្របខណ្ឌមន្រ្តីរាជការជាគ្រូបង្រៀនរួចមក ឯកឧត្តម ធូ ភា អភិបាលរងខេត្តប៉ៃលិនបានអោយដឹងថា៖បច្ចុប្បន្ននេះខេត្តប៉ៃលិនមានសាលាវិទ្យាល័យចំនួន២ និងអនុវិទ្យាល័យ៦ ព្រមទាំងសាលាបឋមសិក្សា៥០ខ្នងដែលកំពុងដំណើរការបង្រៀនដល់ក្មួយៗនិងសិស្សានុសិស្សលើ ចំនេះវិជ្ជាទូទៅនិងលើគ្រប់កំរិត ។
ឯកឧត្តម ឈឿន ប៊ុណ្ណារ័ត្ន អនុរដ្ឋលេខាធិការក្រសួងមុខងារសាធារណៈនិងជាប្រធានក្រុមការងារចុះប្រមូលទិន្នន័យលើការប្រើប្រាស់ក្របខណ្ឌមន្រ្តីរាជការជាគ្រូបង្រៀននិងផ្នែករដ្ឋបាលគ្រូបង្រៀនជាប់កិច្ចសន្យាបានមានប្រសាសន៏ថា៖ការប្រជុំផ្សព្វផ្សាយពេលនេះគឺដើម្បីចុះប្រមូលទិន្នន័យលើការប្រើប្រាស់ក្របខណ្ឌមន្រ្តីរាជការជាគ្រូបង្រៀននិងផ្នែករដ្ឋបាលគ្រូបង្រៀនជាប់កិច្ចសន្យា អោយនាយកនាយករង និងលោកគ្រូអ្នកគ្រូទាំងអស់ចេះបំពេញតារាងទិន្ន័យនិងចេះស្រង់ទិន្ន័យអោយច្បាស់លាស់ដើម្បីដឹងពីស្ថានភាពការងារដែលខិតខំប្រឹងប្រែងកន្លងមក ហើយដឹងពីសមត្ថភាពការងារ ប្រសិទ្ធិភាពការងារ ក្នុងការកែប្រែនិងពង្រឹងសមត្ថភាពការងារ អោយបានល្អ ស្របតាមគោលនយោបាយកែទំរង់ស៊ីជំរៅ តំណាក់កាលទី៣របស់រដ្ឋាភិបាលដែលមានសម្តេចតេជោហ៊ុនសែនជានាយករដ្ឋមន្រ្តីកម្ពុជា ។ ឯកឧត្តមក៏បានផ្តាំផ្ញើរដល់បុគ្គលឹកសិក្សា នាយកនាយរងនិងលោកគ្រូអ្នកគ្រូទាំងអស់ត្រូវយកចិត្តទុកដាក់អនុវត្តការណែនាំពីគ្រូបង្គោល និងត្រូវសួរសំនួរណាដែលឆ្ងល់ទាក់ទងនិងប្រធានបទអោយបានផុលផុស ព្រោះថាកិច្ចប្រជុំពេលនេះមានសារៈសំខាន់ណាស់ចំពោះការអនុវត្តការងារជាក់ស្តែង ដើម្បីទទួលខុសត្រូវលើការងារវិស័យអប់រំនៅខេត្តប៉ៃលិនអោយមានប្រសិទ្ធិភាព។
vv
[youtube id= “xwOibN-jWaE”]
