ដោយ៖ វួច ពឿន វិទ្យុជាតិខេត្តប៉ៃលិន
ថ្ងៃព្រហស្បតិ៍ ៨កើត ខែបុស្ស ឆ្នាំកុរ ឯកស័ក ព.ស២៥៦៣ ត្រូវនឹងថ្ងៃទី0២ ខែមករាឆ្នាំ២០២០ ឯកឧត្តម ផាន់ចាន់ អភិបាលនៃគណៈអភិបាលខេត្តប៉ៃលិន រួមដំណើរដោយលោកអភិបាលក្រុងប៉ៃលិន លោកប្រធាន អនុប្រធានមន្ទីរ មន្រ្តីរាជការ និងក្រុមការងារអនុសាខាកាកបាទក្រហមកម្ពុជាក្រុងប៉ៃលិន បានអញ្ជើញចុះសួរសុខទុក្ខ និងនាំយក អំណោយសង្រ្គោះបន្ទាន់ ទៅឧបត្ថម្ភដល់ប្រជាពលរដ្ឋចំនួន ៥គ្រួសារ ដែលរងគ្រោះដោយភ្លើងឆេះផ្ទះ ស្ថិតនៅភូមិព្រៃមង្គល សង្កាត់អូតាវ៉ៅ ក្រុងប៉ៃលិន ខេត្តប៉ៃលិន។
អំណោយដែលកាកបាទក្រហមក្រុងបានយកទៅចែកជូនដល់គ្រួសារជនរងគ្រោះនាពេលនោះ រួមមាន៖ មួយគ្រួសារៗទទួលបានអង្ករ៥០គីឡូក្រាម ចង្រ្កានហ្គាស១ ឆ្នាំងដាំបាយ ចានបាយ ចានស្រាក់ មុង ភួយ កន្ទេល កំសៀវ ធុងទឹកកក និងសំភារៈផ្សេងៗទៀត ព្រមទាំងថវិកាចំនួន ៣០ម៉ឺនរៀលផងដែរ។
ឯកឧត្តម ផាន់ ចាន់ធុល អភិបាលនៃគណអភិបាលខេត្តប៉ៃលិន បានសម្តែងក្តីសោកស្តាយ អាណិតអាសូរដល់ប្រជាពលរដ្ឋទាំង ៥គ្រួសារ ដែលទទួលរងគ្រោះដោយសារអគ្គីភ័យនេះ ពិសេសគឺ ប្អូនស្រី ឃុត គឹមហេន ដែលទទួលរងការខាតបង់ធំធេងជាងគេ។ ការខាតបង់ដោយអគ្គីភ័យមានទំហំធំធេងណាស់ ដូចពាក្យចាស់លោកពោលថា ”ស៊ូលិចទូកណ្តាលទន្លេ កុំឲ្យភ្លើងឆេះផ្ទះ”។ ឯកឧត្តមបានមានប្រសាសន៍បន្តថា៖ ការបាត់បង់ផ្ទះសំបែង និងទ្រព្យសម្បត្តិដ៏ច្រើនបែបនេះ គឺជារឿងមួយដែលមនុស្សគ្រប់គ្នាពិបាកនឹងទទួលយកបានណាស់ ប៉ុន្តែអ្វីៗវាបានកើតឡើងរួចទៅហើយ។ ដូច្នេះបងប្អូនត្រូវតែតាំងចិត្តអោយរឹងមាំ បន្តការខិតខំប្រឹងប្រែងរកទទួលទាន ដើម្បីអនាគត ក្រុមគ្រួសាររបស់បងប្អូនបន្តទៀត ដូចពាក្យចាស់លោកពោលថា” មានព្រៃ មិនខ្លាចខ្វះអុសដុតទេ”។ ឯកឧត្តមក៏បានមានប្រសាសន៍ណែនាំអោយប្រជាពលរដ្ឋយើងត្រូវមានការប្រុងប្រយ័ត្នខ្ពស់ចំពោះបញ្ហាគ្រោះអគ្គីភ័យនេះ ដោយមុនចេញទៅណាឆ្ងាយពីផ្ទះ ត្រូវបិទគុបភ្លើងអគ្គីសនី ពន្លត់ភ្លើងធូប ភ្លើងទៀត ភ្លើងចង្ក្រាន អោយអស់ជៀសវាងគ្រោះអាក្រក់ណាមួយកើតឡើងជាយថាហេតុ។ ឯកឧត្តមក៏បានមានប្រសាសន៍ណែនាំអោយអាជ្ញាធរមូលដ្ឋានត្រូវមានការគិតគូរខ្ពស់ពីសុខទុក្ខ ជីវភាពរស់នៅ របស់ប្រជាពលរដ្ឋ ហើយត្រូវរាយការមកថ្នាក់លើរបស់ខ្លួនអោយបានឆាប់រហ័ស ដើម្បីរួមគ្នាគិត ដោះស្រាយជូនប្រជាពលរដ្ឋយើងអោយបានទាន់ពេលវេលា ពិសេសត្រូវបំរើសេវាសាធារណៈជូនប្រជាពលរដ្ឋអោយបានល្អតាមគោលនយោបាយរបស់រាជរដ្ឋភិបាល ដែលមានសម្តេច អគ្គមហាសេនាបតីតេជោ ហ៊ុន សែន ជាប្រមុខ។
សូមបញ្ជា់ថា៖ ក្នុងករណីគ្រោះមហន្តរាយដោយអគ្គីភ័យខាងលើនេះ បណ្តាលអោយខូចខាតផ្ទះអស់ទាំងស្រុងចំនួន១ខ្នង ទំហំ ៨ម៉ែត្រx៥០ម៉ែត្រ, ត្រាក់ទរ័ចំនួន ១គ្រឿង,ម៉ាស៊ីនដេរសំលៀកបំពាក់ ១ឈុត, ម៉ាស៊ីនកាត់ស្មៅ, ម៉ាស៊ីនបាញ់ថ្នាំ, ឈើសំរាប់ទុកសាងសង់ផ្ទះ រួមទាំងរបស់ប្រើប្រាស់ជាច្រើនទៀត។ ផ្ទះ និងរបស់របរទាំងឡាយដែលបានខូចខាតដោយអគ្គីភ័យនេះ មួយភាគធំ គឺជាកម្មសិទ្ធរបស់ប្អូនស្រី ឃុត គឹមហេន ភេទស្រី អាយុ៣៧ឆ្នាំ, ដោយឡែកប្រជាពលរដ្ឋចំនួន ៤គ្រួសារទៀត គឺគ្រាប់តែជាកម្មករស្នាក់នៅផ្ទះខាងលើនេះប៉ុណ្ណោះ។ យោងតាមរបាយការណ៍របស់មន្រ្តីនគរបាលមូលដ្ឋាន មូលហេតុនៃការឆេះខាងលើនេះ មិនបង្ករអោយមានមនុស្សរងរបួសនោះទេ ហើយការឆេះនេះ ក៏មិនទាន់ដឹងពីមូលហេតុច្បាស់លាស់នៅឡើយដែរ ដោយម្ចាស់ផ្ទះ និងកម្មករមិនបាននៅទីនោះទេ នៅពេលកើតហេតុ៕ ពិនិត្យ កែសម្រួល៖ វួច ពឿន
