ដោយ៖ វួច ពឿន វិទ្យុជាតិខេត្តប៉ៃលិន
រសៀលថ្ងៃច័ន្ទ ១៣កើត ខែមិគសិរ ឆ្នាំកុរ ឯកស័ក ព.ស២៥៦៣ ត្រូវនឹងថ្ងៃទី៩ ខែធ្នូ ឆ្នាំ២០១៩ ក្រុមការងារគណបក្សប្រជាជនកម្ពុជាចុះជួយសង្កាត់ទួលល្វា ដឹកនាំដោយ ឯកឧត្តម ធូ ភា ប្រធានក្រុមការងារ រួមដំណើរដោយលោក យូ ពៅ ប្រធានមន្ទីរព័ត៌មានខេត្ត និងជាអនុប្រធានក្រុមការងារ លោក លីម វាសនា ប្រធានពន្ធនាគារខេត្ត និងជាអនុប្រធានក្រុមការងារ ព្រមទាំងអនុប្រធានមន្ទីរសមាជិកក្រុមការងារចុះជួយសង្កាត់ទួលល្វាមួយចំនួនទៀត បានអញ្ជើញចុះសួរសុខទុក្ខ និងនាំយកថវិកាចំនួន១លានរៀល ទៅជួយឧបត្ថម្ភដល់លោក លឹម វាសនា ប្រធានមន្ទីរទេសចរខេត្ត និងជាអនុប្រធានក្រុមការងារចុះជួយសង្កាត់ទួល្វា ដែលទទួលរងគ្រោះថ្នាក់ចរាចរណ៍ និងកំពុងសម្រាកព្យាបាលនៅមន្ទីរពេទ្យយោធភូមិភាគទី៥ ខេត្តបាត់ដំបង។
ឯកឧត្តម ធូ ភា ប្រធានក្រុមការងារគណបក្សប្រជាជនកម្ពុជាចុះជួយសង្កាត់ទួលល្វាបានមានប្រសាសន៍លើកទឹកចិត្តអោយលោក លឹម វាសនា ស្ងប់ចិត្ត គិតគូពីសុខភាពអោយបានច្រើន ដើម្បីឆាប់ជាសះស្បើយពីរជំងឺ ត្រឡប់ទៅបំពេញការងារភារកិច្ចរបស់ខ្លួនវិញ។ ឯកឧត្តមបានមានប្រសាសន៍ថា៖ គ្រោះថ្នាក់អាចនឹងកើតឡើងគ្រប់ពេលវេលា មិនមាននណាម្នាក់ដឹងមុននោះឡើយ ហើយករណីគ្រោះថ្នាក់ចរាចរណ៍លើរូបលោក លឹម វាសនា នេះ គឺជាករណីមួយក្នុងចំណោមករណីជាច្រើន ដែលធ្លាប់កើតឡើងចំពោះមនុស្ស។ ដូច្នេះអ្វីដែលត្រូវធ្វើបន្តនេះគឺសម្រាកព្យាបាល តាមវេជ្ជបញ្ជារបស់លោកវិជ្ជបណ្ឌិត និងមិនត្រូវមានការសោកស្តាយ ឬអាក់អន់ស្រពន់ចិត្តអ្វីឡើយ។ ឯកឧត្តមបានមានប្រសាសន៍បន្តទៀតថា៖ ថវិកាចំនួនមួយលានរៀល សំរាប់ឧបត្ថម្ភដល់លោក លឹម វាសនា នាពេលនេះ គឺបានមកពីការចូលរួមបរិច្ចាករបស់ក្រុមការងារចុះជួយសង្កាត់ទួលល្វាទាំងអស់ ដើម្បីជួយរួមចំណែកដោះស្រាយរាល់ការចំណាយរបស់ក្រុមគ្រួសារលោក ដែលនេះជាវប្បធម៌ចែករំលែករបស់គណបក្សប្រជាជនកម្ពុជាតាំងពីដើមរៀងមក៕ ដោយ៖ វួច ពឿន
