ប៉ៃលិន៖ ថ្ងៃទី២៨ ខែតុលា ឆ្នាំ២០១៩ ឯកឧត្តម ផាន់ ចាន់ធុល អភិបាលខេត្តប៉ៃលិន អមដំណើរដោយមន្ត្រីជំនាញពាក់ព័ន្ធ និងអាជ្ញាធរមូលដ្ឋាន បានអញ្ជើញបើកវេទិកាពហុភាគីអ្នកពាក់ព័ន្ធស្តីពី ការចែករំលែកចំណេះជំនាញ បទពិសោធន៍លើខ្សែរសង្វាក់តម្លៃមាន់ស្រែ របស់គម្រោងជំរុញទីផ្សារសម្រាប់កសិកម្មខ្នាតតូច (AIMS) នៅភូមិស្រែអន្ទាក់ ឃុំស្ទឹងត្រង់ ស្រុកសាលាក្រៅ ខេត្តប៉ៃលិន ដើម្បីជំរុញការផ្គត់ផ្គង់ផលិតផលកសិកម្ម ដូចជាបន្លែ សាច់មាន់ សម្រាប់ទីផ្សារក្នុងស្រុក ដែលបច្ចុប្បន្នគ្របដណ្ដប់ដោយផលិតផលនាំចូលពីក្រៅបរទេស។
លោក ឈឿន ឈិន អនុប្រធានមន្ទីរពាណិជ្ជកម្មខេត្តប៉ៃលិន បានឱ្យដឹងថា៖ ក្រសួងពាណិជ្ជកម្មបានចាប់ផ្តើម គម្រោង ជំរុញទីផ្សារសម្រាប់កសិកម្មខ្នាតតូច (AIMS) នេះ ដោយមានតម្លៃ ៦១លានដុល្លារសហរដ្ឋអាមេរិក អនុវត្តរយៈពេល ៦ឆ្នាំ ពីឆ្នាំ២០១៧ ដល់ឆ្នាំ២០២២ ហើយគ្រួសារចំនួន ៧,៥ម៉ឺនគ្រួសារទូទាំងប្រទេស នឹងទទួលបានប្រយោជន៍ពីគម្រោងនេះ ហើយប្រភពថវិកាសម្រាប់អនុវត្តគម្រោង បានមកពីប្រាក់កម្ចីរបស់មូលនិធិអន្តរជាតិសម្រាប់ការអភិវឌ្ឍកសិកម្ម (IFAD) និងបដិភាគរបស់រដ្ឋាភិបាលកម្ពុជា និងវិស័យឯកជនពាក់ព័ន្ធ។
ឯកឧត្តម ផាន់ ចាន់ធុល អភិបាលខេត្តប៉ៃលិន បានមានប្រសាសន៍លើកឡើងថា៖ បច្ចុប្បន្នប្រាក់ចំណូលសរុបរបស់ប្រជាជនកម្ពុជា ក៍ដូចជាខេត្តប៉ៃលិន ដែលទទួលបានពីវិស័យកសិកម្មនៅមានកម្រិតទាបនៅឡើយ គឺប្រហែល ១៦ភាគរយ ខណៈចំណូលពីប្រាក់ឈ្នួល និងប្រាក់បៀវត្សរ៍មានប្រហែលជិត ៤៥ភាគរយ ហើយប្រជាជនប្រហែល ៧៩ភាគរយ កំពុងរស់នៅទីជនបទ និងមានប្រភពប្រាក់ចំណូលពីវិស័យកសិកម្ម ហើយភាគច្រើនជាគ្រួសារទីទាល់ក្រ។ ឯកឧត្តមអភិបាលខេត្ត បានមានប្រសាសន៍បន្តថា៖ តាមរយៈគម្រោងជំរុញទីផ្សារសម្រាប់កសិកម្មខ្នាតតូច (AIMS) នឹងជំរុញលើផលិតផលកសិកម្មចំនួន៥ ដូចជាស្រូវក្រអូប បន្លែ មាន់ស្រែ ដំឡូងមី និងសរសៃសូត្រ ដោយផ្ដល់បច្ចេកទេសដើម្បីផលិតផលកសិកម្ម មានគុណភាពស្តង់ដារ និងផ្គត់ផ្គង់ទៀងពេលវេលាតាមតម្រូវការទីផ្សារ ផ្ដល់ទុនសម្រាប់ផលិត នឹងស្វែងរកទីផ្សារលក់ផលិតផលដែលផលិតបានជូនកសិករខ្នាតតូចក្រីក្រ។ ក្នុងឱកាសនោះផងដែរ ឯកឧត្តម ផាន់ ចាន់ធុល បានមានប្រសាសន៍សង្ឃឹមយ៉ាងមុតមាំថា៖ ចំណេះដឹងដែលក្រុមការងារ គម្រោង (AIMS) នៃក្រសួងពាណិជ្ជកម្ម បានសម្របសម្រួលអញ្ជើញអ្នកមានចំណេះដឹង ជំនាញ និងបទពិសោធន៍ច្រើន យកមកចែករំលែកនៅថ្ងៃនេះ និងធ្វើឱ្យមន្ត្រីជំនាញនៅមូលដ្ឋានខេត្តប៉ៃលិន យើង និងមន្ត្រីពាក់ព័ន្ធ ម្ចាស់សហគ្រាស ពាណិជ្ជករ សិប្បករ សហគមន៍ មានគំនិតច្នៃប្រឌិតកាត់តែទូលំទូលាយ ដើម្បីបង្កើនគុណភាពអាជីវកម្មកាន់តែប្រសើរឡើង ហើយឯកឧត្តមក៍បានចែកជូនសៀវភៅបច្ចេកទេសការចិញ្ចើមសត្វដល់កសិករម្នាក់១ក្បាលផងដែរ។
សូមបញ្ជាក់ថា៖ ចាប់ពីឆ្នាំ២០១៨មក គម្រោងជំរុញទីផ្សារសម្រាប់កសិកម្មខ្នាតតូច (AIMS) បានអនុវត្តន៍កិច្ចសន្យាចំនួន ៩ នៅខេត្តប៉ៃលិន លើ ៥ភូមិ ២ឃុំ ក្នុងតំបន់គោលដៅ កសិករផលិតចំនួន ២៩នាក់ ស្រី ១៨នាក់ ក្នុងនោះមាន៖ ១-មាន់សាច់បានលក់ ចំនួន ២៦៩១ក្បាល គិតទឹកប្រាក់ចំនួន ៥៧ ៧២១ ៥០០រៀល ២-កូនមាន់បានលក់ ចំនួន ១៥០០ក្បាល គិតទឹកប្រាក់ ចំនួន ៧ ៥០០ ០០០រៀល និង៣-ពងមាន់បានលក់ ចំនួន ៨៧០០គ្រាប់ គិតទឹកប្រាក់ ចំនួន ១១ ៣១០ ០០០រៀល សរុបទឹកប្រាក់ទាំងអស់ចំនួន ៧៦ ៥៣១ ៥០០រៀល ស្មើនឹង ១៩ ១៣២,៨៧ដុល្លាសហរដ្ឋអាមេរីក។
