កាលពីវេលាម៉ោង ២១ :១០ នាទីយប់ ថ្ងៃសុក្រ ០៤កើត ខែអាសាឍ ឆ្នាំកុរ ឯកស័ក ព.ស២៥៦៣ ត្រូវនឹងថ្ងៃ០៥ ខែកក្កដា ឆ្នាំ២០១៩ មានករណីគ្រោះថ្នាក់ចរាចរណ៍មួយកើតឡើង រវាងម៉ូតូ និងម៉ូតូបើកបរច្រាសទិសគ្នា នៅចំណុចមុខកាស៊ីណូ ហុង បូ ស្ថិតនៅក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន បណ្ដោយឲ្យមនុស្ស ០២នាក់ របួសធ្ងន់ និង ០១នាក់ទៀតរបួសស្រាល។
ភាគីបង្ករមានគ្នា ០២នាក់៖០១-ឈ្មោះ ឡា ភេទប្រុស អាយុ ៣០ ឆ្នាំ មុខរបរកម្មករចំការម្រេច រស់នៅភូមិផ្សារព្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន ។ បើកបរម៉ូតូម៉ាក MSX ពណ៌ក្រហម ពាក់ស្លាក់លេខ បន្ទាយមានជ័យ (រងរបួសស្រាល)។ ទី២-ឈ្មោះ វ៉ា ភេទប្រុស អាយុ ២៥ ឆ្នាំ មុខរបរកម្មករចំការម្រេច (រងបួសធ្ងន់ បាក់ឆ្អឹងដងកាំបិទខាងឆ្វេង )។ ចំណែកជនរងគ្រោះឈ្មោះ អំ ភេទស្រី អាយុ ប្រហែល ២៥ ឆ្នាំ ជនជាតិ ថៃ មានមុខរបរជាបុគ្គលិតកាស៊ីណូ ឌឺហ្គដអហ្វវល រស់នៅភូមិ ផ្សារព្រំជើង ឃុំស្ទឹងកាច់ ស្រុកសាលាក្រៅ ខេត្តប៉ៃលិន ។ បើកបរម៉ូតូម៉ាក ZOOMER-X ពណ៌ សលាយខ្មៅ ពាក់ស្លាកលេខ ប៉ៃលិន 1C-1455 (រងរបួសធ្ងន់ )។
មូលហេតុបណ្ដាលមកពីរកត្តាមនុស្ស បើកបរខ្វះការប្រុងប្រយ័ត្ន ឡើងជែងរថយន្តមួយគ្រឿងទៀត ក៏ទៅបុកនឹងម៉ូតូជនរងគ្រោះ ដែលកំពុងបើកបរឆ្លងកាត់ផ្លូវពីត្បូងទៅជើងចំពេញទំហឹង។
បច្ចុប្បន្នជនរងគ្រោះដែលជាជនជាតិថៃ ត្រូវបានបញ្ចូនទៅសម្រាកព្យាបាលនៅមន្ទីរពេទ្យប្រទេសថៃ ចំណែកជនរងគ្រោះ ជាជនបង្ករត្រូវបានបញ្ជូនទៅសម្រាកព្យាបាលនៅមន្ទីរពេទ្យបង្អែកខេត្តប៉ៃលិន។ វត្តុតាងត្រូវបានដកហូតយកទៅរក្សារទុកនៅទីស្នាក់ការប៉ុស្តិ៍ស្ទឹងកាច់រង់ចាំការដោះស្រាយ។
ដោយ៖ វួច ពឿន
ប្រភពៈ ព្រិន្ទបាលទោ វ៉ន ដារ៉ា ការិយាល័យផ្សព្វផ្សាយ អប់រំនៃស្នងការដ្ឋាននគរបាលខេត្តប៉ៃលិន
