(07-01-2017) ប៉ៃលិន៖ ថ្ងៃទី៧ ខែមករា ឆ្នាំ២០១៧ គណបក្សប្រជាជនកម្ពុជាខេត្តប៉ៃលិន បានធ្វើពិធីរំលឹកខួបអនុស្សាវរីយ៍លើកទី៣៨ នៃទិវាជ័យជំនះ ៧មករា ១៩៧៩- ៧មករា២០១៧ នៅមន្ទីរគណបក្សខេត្ត ក្រោមអធិបតី ឯកឧត្តម អ៊ី ឈាន ប្រធានក្រុមការងារថ្នាក់កណ្តាលគណបក្សប្រជាជនកម្ពុជាចុះជួយខេត្តប៉ៃលិន ឯកឧត្តម កើត សុធា ប្រធានគណបក្សខេត្ត ឯកឧត្តម ឡី ចាន់ឆាយ អនុប្រធានគណបក្សខេត្ត ឯកឧត្តម លោកជំទាវ សមាជិក សមាជិការគណៈកម្មាធិការបក្សខេត្ត លោកប្រធានបក្សស្រុក-ក្រុង បក្សឃុំ- សង្កាត់ និង បក្សភូមិជាច្រើននាក់ទៀត។
ឯកឧត្តម កើត សុធា ប្រធានគណបក្សប្រជាជនកម្ពុជាខេត្តប៉ៃលិនបានអានសាររបស់សម្តេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា ដែលមានខ្លឹមសារថា៖ ថ្ងៃ៧ មករា ១៩៧៩ គឺជាថ្ងៃជ័យជំនះជាប្រវត្តសាស្រ្តរបស់ប្រជាជនកម្ពុជាដែលបានវាយផ្តួលរំលំរបបប្រល័យពូជសាសន៍ប៉ុលពតបញ្ចប់សម័យកាលដ៏ខ្មៅងងឹងបំផុតរបស់កម្ពុជា ហើយបើកឡើងនូវទំព័រសករាជថ្មី គឺឯករាជ្យ សេរីភាព ប្រជាធិបតេយ្យ និងវឌ្ឍនភាពសង្គម។ ថ្ងៃនេះ ជាទិវាដ៏នក្ខត្តឬក្ស ដែលប្រជាជនកម្ពុជាទូទាំងប្រទេសចូលរួមដោយក្តីសោមនស្សរីករាយក្រៃលែង បានប្រារព្វខួបអនុស្សាវរីយ៍លើកទី៣៨ នៃទិវាជ័យជំនះដ៏រុងរឿងនេះ ជាមួយមោទនភាពដ៏ថ្លៃថ្លាចំពោះសមិទ្ធិផលធំៗជាប្រវត្តសាស្រ្តយ៉ាងច្រើន ដែលប្រជាជនយើងសំរេចបានក្នុងរយៈពេល៣៨ឆ្នាំកន្លងមក រួមទាំងសមិទ្ធិផលលើគ្រប់វិស័យក្នុងឆ្នាំ២០១៦ ដែលទើបតែឆ្លងផុតទៅថ្មីៗនេះ។ យើងប្រារព្វពិធីដ៏ឱឡារឹកនេះឡើង ក្នុងស្មារតីចងចាំជានិច្ចនូវគុណូបការៈដ៏ឧត្តុង្គឧត្តម របស់វីរៈកម្មាភិបាល យុទ្ធជន យុទ្ធនារី នៃរណសិរ្សសាមគ្គីសង្គ្រោះជាតិកម្ពុជា និង វីរៈកងទ័ពស្ម័គ្រចិត្តវៀណាម ដែលបានធ្វើការលះបង់យ៉ាងធំធេងក្នុងការប្រយុទ្ធ ដើម្បីផ្តួលរំលំរបបប្រល័យពូជសាសន៍ប៉ុលពត និងការពារការរស់ឡើងវិញរបស់កម្ពុជា។ សូមសំដែងការដឹងគុណចំពោះប្រទេសជាមិត្តជិតឆ្ងាយ និងប្រជាជនស្មេហាសន្តិភាព និងយុត្តិធម៌លើពិភពលោក ដែលបានជួយឧបត្ថម្ភគាំទ្រយ៉ាងស្មោះស្ម័គ្រក្នុងបុព្វហេតុដ៏ឧត្តុងឧត្តមនេះ។ ព្រមជាមួយគ្នានេះ យើងទាំងអស់គ្នាសូមលំអោនកាយ សង្រួមចិត្ត គោរពវិញ្ញាក្ខ័ន្ធជនរួមជាតិ ជាង៣លាននាក់ ដែលបានស្លាប់បាត់បង់ជីវិតយ៉ាងអាណោច អាធម្ម និងអយុត្តិធម៌បំផុត ក្រោមរបបប្រល័យពូជសាសន៍ ហើយឧទ្ទិសបួងសួងសូមអោយវិញ្ញាណក្ខ័ន្ធរបស់លោកទាំងនោះ ទៅកាន់សុគតិភពជារៀងដរាបទៅ។
ឯកឧត្តម អ៊ី ឈាន ប្រធានក្រុមការងារថ្នាក់កណ្តាលគណបក្សប្រជាជនកម្ពុជាចុះជួយខេត្តប៉ៃលិន បានមានប្រសាសន៍ថា ថ្ងៃ៧មករា គឺជាថ្ងៃប្រវត្តិសាស្ត្រមួយរបស់ប្រទេសកម្ពុជា ហើយក៏ជាថ្ងៃកំណើតទី២ របស់យើង។ មហាជ័យជំនះជាប្រវត្តិសាស្ត្រថ្ងៃទី៧ ខែមករា ឆ្នាំ១៩៧៩ ដែលបានផ្តួលរំលំរបបប្រល័យពូជសាសន៍ ប៉ុល ពត, សង្គ្រោះជាតិ មាតុភូមិ និងប្រជាជនកម្ពុជា ឱ្យមានជីវិតរស់រានឡើងវិញ បានទាន់ពេលវេលា ធ្វើអោយប្រជាជនកម្ពុជាទូទាំងប្រទេសមានអ្វីៗនៅថ្ងៃនេះ និងមានអនាគតប្រកបដោយក្តីសង្ឃឹម។ ឯកឧត្តមបានមានប្រសាន៍បន្តថា កន្លងមកមានជនអគតិ ឬក្រុមជ្រុលនិយមមួយចំនួន គេចាត់ទុកថា ថ្ងៃ៧មករា គឺជាថ្ងៃដែលបរទេសឈ្លានពាន ក្នុងខណៈដែលរូបគេ ក៏បានកើតឡើងពីថ្ងៃ៧មករានេះដែរនោះ ក៏គេនៅតែមិនទទួលស្គាល់ថ្ងៃ៧មករា។ ដូចច្នេះបានសេចក្តីថា គេនៅស្រលាញ់របបប្រល័យពូជសាស្ត្រ និងចង់ឲ្យប្រទេសកម្ពុជា មានវិនាសកម្មបន្តទៀត ចឹងអ្នកដែលប្រឆាំងថ្ងៃ៧មករា គឺប្រឆាំងខ្លួនឯង ប្រឆាំងនឹងការរស់ឡើងវិញរបស់ប្រជាពលរដ្ឋយើងរ៉ាប់លាននាក់។ ដូចនេះយើងទាំងអស់គ្នាត្រូវចងចាំនិងដឹងគុណ ថ្ងៃ៧មករា ដែលជាថ្ងៃកំណើតទី២របស់ខ្លួន និងដឹងគុណដល់ថ្នាក់ដឹកនាំ យុទ្ធជន យុទ្ធនារីដែលបានបូជាជីវិតដើម្បីបុព្វហេតុជាតិ មាតុភូមិរបស់យើង៕
vv
[youtube id= “tMkZl9FMOac”]
