(15-10-2016) ប៉ៃលិន៖ នៅល្ងាច ថ្ងៃទី១៥តុលា ឆ្នាំ២០១៦នៅសាលប្រជុំក្រុមប្រឹក្សាខេត្តប៉ៃលិន មានរៀបចំពិធីចុះហត្ថលេខារវាងរដ្ឋបាលខេត្តប៉ៃលិននៃព្រះរាជាណាចក្រកម្ពុជា និងខេត្តតៃនិញនៃសាធារណៈរដ្ឋសង្គមនិយមវៀតណាម លើផែនការសហប្រតិបតិ្តការដំណាក់កាលទី១៦ ដើម្បីស្វែងរកអដ្ឋិធាតុយុទ្ធជនវៀតណាម ដែលបានស្លាប់ក្នុងសម័យសង្គ្រាម នៅក្នុងភូមិសាស្ត្រខេត្តប៉ៃលិន នារដូវប្រាំងឆ្នាំ២០១៦/ ២០១៧ ដែលពិធីនេះបានប្រព្រឹត្តទៅក្រោមអធិបតីភាពឯកឧត្តម ឡី ចាន់ឆាយ ប្រធានក្រុមប្រឹក្សាខេត្ត ឯកឧត្តម ផាន់ ចាន់ធុល អភិបាលរងខេត្ត និងលោក វរៈសេនីយ៍ឯក ង្វៀង វ៉ាន់ដែប អនុប្រធាននយោបាយយោធានៃគណះអចិន្ត្រៃយ៍លេខ១២៣៧នៃខេត្តតៃនិញ ព្រមទាំងមានការអញ្ជើញចូលរួមពីសំណាក់ ថ្នាក់ដឹកនាំ កងកម្លាំងប្រដាប់អាវុធខេត្តប៉ៃលិន និងខេត្តតៃនិញផងដែរ។
លោក វរៈសេនីយ៍ឯក ង្វៀង វ៉ាន់ដែប អនុប្រធាននយោបាយយោធានៃគណះអចិន្ត្រៃយ៍លេខ១២៣៧នៃខេត្តតៃនិញ បានឱ្យដឹងថា៖ ការចុះហត្ថលេខានេះអនុវត្តតាមផែនការលេខ២៤៨៧/KH-CCTចុះថ្ងៃទី៧ ខែកញ្ញា ឆ្នាំ២០១៦របស់នាយកដ្ឋាននយោបាយភូមិភាគទី៧ ស្តីពីការស្វែងរុករក និងធ្វើមាតុភូមិនិវត្តអដិ្ឋធាតុយុទ្ធជនកងទ័ពវៀតណាមដែលបានពលីជីវិតក្នុងសម័យសង្គ្រាមនៅខេត្តប៉ៃលិន ដំណាក់កាលទី១៦ រដូវប្រាំងឆ្នាំ២០១៦/២០១៧។ លោកបន្តថា៖ កន្លងមក អង្គភាពតំបន់ប្រតិ្តបតិការសិករងខេត្តប៉ៃលិន សហការជាមួយក្រុមK70 កង វៀតណាម បានរុករកអដ្ឋិធាតុ ធ្វើមាតុភូមិនិវត្តន៍ចំនួន ៦៦អដិ្ឋធាតុ ហើយនៅរដូវប្រាំងឆ្នាំ២០១៦/២០១៧នេះ ក្រុមការងារតំបន់ប្រតិបត្តិការសឹករងខេត្តប៉ៃលិននិងក្រុមK70កងទ័ពវៀតណាម នឹងបន្តសហការរុករកចំនួន ១៧អដិ្ឋធាតុទៀត។ លោកក៏បានថ្លែងអំណរគុណដល់អាជ្ញាធរខេត្តប៉ៃលិន គ្រប់លំដាប់ថ្នាក់ដែលកន្លងមកបានសហការល្អជាមួយក្រុមK70 របស់វៀតណាម ធ្វើអោយដំណើការរុករកអដិ្ឋធាតុកងទ័ពវៀតណាមទទួលបានជោគជ័យ។
ឯកឧត្តម ផាន់ ចាន់ធុល អភិបាលរងខេត្តបានមានប្រសាសន៍លើកឡើងថា៖ ការរុករកអដ្ឋិធាតុកងទ័ពស្ម័គ្រចិត្តវៀតណាមដែលបានស្លាប់ក្នុងសម័យសង្គ្រាមនៅក្នុងភូមិសាស្ត្រខេត្តប៉ៃលិន ដើម្បីធ្វើមាតុភូមិនិវត្តន៍ពេលនេះ គឺជាកិច្ចសហប្រតិបត្តិការល្អរវៀងរាជរដ្ឋាភិបាលនៃព្រះរាជាណាចក្រកម្ពុជា និងរដ្ឋាភិបាលសាធារណៈរដ្ឋសង្គមនិយមវៀតណាម នាពេលកន្លងមក។ ឯកឧត្តមបន្តថា៖ ការរុករកនិងធ្វើមាតុភូមិនិវត្តន៍អដ្ឋិធាតុកងទ័ពវៀតណាម គឺជាការងារមនុស្សធម៌ដ៏ល្អ ពីព្រោះជនជាតិណាក៏ដោយដែលបាត់បង់ជីវិតក្នុងប្រទេសផ្សេងនោះគេតែងតែធ្វើមាតុភូមិនិវត្តមកប្រទេសរបស់ខ្លូនដើម្បីឱ្យសាច់ញាតិធ្វើបុណ្យតាមប្រពៃណីដូច្នេះអាជ្ញាធរខេត្ត និងកងកម្លាំងពាក់ព័ន្ធក្នុងខេត្ត ត្រូវបន្តខិតខំសហប្រតិបត្តិការ និងបង្កលក្ខណៈអោយបានងាយស្រួលដល់ដំណើការរុករកអដ្ឋិធាតុកងទ័ពវៀតណាមដែលបានពលីជីវិតនៅទឹកដីខេត្តប៉ៃលិនអោយទទួលបានលទ្ធផលល្អ។
vv
[youtube id= “wDSH4l5dBpI”]
