(20-09-2016) ប៉ៃលិន៖ នៅសាលាខេត្តប៉ៃលិនល្ងាចថ្ងៃទី២០ ខែកញ្ញា ឆ្នាំ២០១៦ ក្រុមការងារគណៈគម្មាធិការជាតិគ្រប់គ្រងគ្រោះមហន្តរាយប្រជុំផ្សព្វផ្សាយច្បាប់ស្តីពីការគ្រប់គ្រងគ្រោះមហន្តរាយ និងពិនិត្យការងារឆមាសទី១ឆ្នាំ២០១៦ ក្រោមអធិបតីភាពឯកឧត្តមបណ្ឌិត ញឹម វណ្ណដា ទេសរដ្ឋមន្រ្តីទទួលបន្ទុកអនុប្រធានប្រចាំការនិងជាប្រធានគណៈកម្មាធិការប្រតិបត្តិនៃគណៈកម្មាធិការជាតិគ្រប់គ្រងគ្រោះមហន្តរាយ និងមានការអញ្ជើញចូលរួមពីសំណាក់ឯកឧត្តមកើត សុធា អភិបាលខេត្ត ព្រមទាំងអាជ្ញាធរ ថ្នាក់ដឹកនាំមន្ត្រីរាជការ ជាច្រើននាក់ផងដែរ។
បន្ទាប់ពីឯកឧត្តម និត អ៊ែល ទីប្រឹក្សាច្បាប់នៃគណៈកម្មាធិការជាតិ គ្រប់គ្រងគ្រោះមហន្តរាយបានអានច្បាប់ស្តីពីការគ្រប់គ្រងគ្រោះមហន្តរាយរួចមក ឯកឧត្តមកើត សុធា អភិបាលខេត្តប៉ៃលិនបានធ្វើរបាយការណ៏ពីសកម្មភាពការងារក្នុងឆមាសទី១បានអោយដឹងថា៖ក្នុងដើមឆ្នាំ២០១៦ ចាប់ពីខែកុម្ភៈរហូតដល់ខែមិថុនាប្រជាពលរដ្ឋស្ទើរតែទូទាំងខេត្តប៉ៃលិនបានជួបគ្រោះរាំងស្ងួតក្នុងកម្រិតធ្ងន់ធ្ងរគ្មានទឹកធ្វើកសិកម្មឫដាំណាំរួមផ្សំ ហើយរហូតដល់ខែមេសាប្រជាជនចំនួន៦៧៣៦គ្រួសារស្ទើរតែគ្មានទឹកប្រើប្រាស់ប្រចាំថ្ងៃទៀតផង។ឯកឧត្តមបន្តថាៈនៅចុងខែមិនាដើមខែមេសារនិងខែឧសភាមានការរងគ្រោះដោយខ្យល់កន្រ្តាក់លើសង្កាត់ចំនួន២គឺសង្កាត់អូតាវ៉ៅ និងសង្កាត់ទួលល្វាក្នុងក្រុងប៉ៃលិន និងឃុំចំនួន២គឺឃុំស្ទឹងត្រង់និងឃុំអូរអណ្តូងក្នុងស្រុកសាលាក្រៅ ក្នុងនោះរលំផ្ទះអស់០៨ខ្នង របើកដំបូលធ្ងន់ធ្ងរចំនួន១៨ខ្នងនិងផ្ទះរបើកដំបូលចំនួន២៣៦ខ្នង សរុបរួម២៦២ខ្នង។ក្រៅពីនោះប្រជាពលរដ្ឋរងគ្រោះដោយសាររន្ទះបាញ់ចំនួន៤លើក ស្លាប់មនុស្ស២នាក់របួស១នាក់ និងងាប់គោអស់៤ក្បាល។ភ្លើងឆេះផ្ទះចំនួន៤លើក ស្មើនិង៤គ្រួសារ ជាន់មីនចំនួន០៤លើករបួសចំនួន០៤លើកក្នុងនោះស្រី២លើក ហើយដោយភាពរាំងស្ថួតអូសបន្លាយយូរពេកទើបធ្វើអោយប្រជាពលរដ្ឋ៥៩៦គ្រួសារខ្វះខាតស្បៀងអាហារ ក្នុងចំណោមគ្រួសារទាំងនោះបានធ្វើចំណាកស្រុកទៅធ្វើការនៅប្រទេសថៃធ្វើអោយតួលេខប្រជាពលរដ្ឋចំណាកស្រុកកើនឡើងដោយគិតមកដល់បច្ចុប្បន្នមានចំនួន៤២១៣នាក់ក្នុងនោះស្រី១៩៧៣នាក់។
ឯកឧត្តមបណ្ឌិត ញឹម វណ្ណដា ទេសរដ្ឋមន្រ្តីទទួលបន្ទុកអនុប្រធានប្រចាំការនិងជាប្រធានគណៈកម្មាធិការប្រតិបត្តិនៃគណៈ កម្មាធិការជាតិគ្រប់គ្រងគ្រោះមហន្តរាយបានមានប្រសាសន៏កោតសរសើរដល់ថ្នាក់ដឹកនាំខេត្តប៉ៃលិនទាំងអស់ដែលចូលរួមទប់ស្កាត់និងដោះស្រាយដល់បងប្អូនប្រជាពលរដ្ឋដែលរងគ្រោះមហន្តរាយផ្សេងៗដែលកើតមានឡើង ជាពិសេសបានចូលរួមចំណែកអនុវត្តគោលនយោបាយរបស់រាជរដ្ឋាភិបាលក្នុងការជួយសង្គ្រោះប្រជាពលរដ្ឋជួបគ្រោះមហន្តរាយផ្សេងៗបានទាន់ពេលវេលា។ឯកឧត្តមក៏ណែនាំដល់ថ្នាក់ដឹកនាំខេត្តគ្រប់ជាន់ថ្នាក់ទាំងអស់ត្រូវយកចិត្តទុកដាក់អនុវត្តច្បាប់ស្តីពីការគ្រប់គ្រងគ្រោះមហន្តរាយអោយល្អទៅតាមតួនាទីភារៈកិច្ចដែលបានដាក់ជូន និងជាពិសេសត្រូវចេះរាយការណ៏ពីសកម្មភាពដែលកើតឡើងនៅក្នុងខេត្តអោយថ្នាក់លើបានជ្រាបព្រមទាំងថ្នាក់ដឹកនាំខេត្តទាំងអស់ត្រូវសហការជាមួយអាជ្ញាធរមូលដ្ឋានអោយល្អដើម្បីដើម្បីក្តាប់នូវសភាពការក្នុងការចាត់វិធានការដោះស្រាយអោយបានទាន់ពេលវេលា ក្នុងន័យបំរើការពារបងប្អូនប្រជាពលរដ្ឋអោយមានសុខសុវត្តិភាព។
vv
[youtube id= “Wa5Kb5u6Wqw”]
