ប៉ៃលិន៖ នៅសាលាស្រុកពោងណាំរ៉ន ខេត្តចាន់បុរី ប្រទេសថៃ ថ្ងៃទី១៤ ខែធ្នូ ឆ្នាំ២០១៩ ឯកឧត្តម ផាន់ ចាន់ធុល អភិបាលខេត្តប៉ៃលិន បានដឹកនាំប្រតិភូ ចូលរួមប្រជុំពិភាគ្សាការងារ ជាមួយរដ្ឋបាលខេត្តចាន់បុរី ព្រះរាជាណាចក្រថៃ ដែលដឹកនាំដោយ ឯកឧត្តម វីធូរ៉ាត់ ស្រ៊ីណាម អភិបាលខេត្ត ដើម្បីពង្រឹងចំណងមិត្តភាព និងកិច្ចសហប្រតិបត្តិការ រវាងខេត្តនៅជាប់ព្រំដែននៃប្រទេសទាំង២ ឱ្យបានកាន់តែជិតស្និទ្ធបន្ថែមទៀត ជាពិសេសការផ្លាស់ប្តូរកសិផលឆ្លងព្រំដែនរវាងខេត្តទាំង២។
ក្នុងកិច្ចប្រជុំនោះ ឯកឧត្តម ផាន់ ចាន់ធុល អភិបាលខេត្តប៉ៃលិន ក៍បានស្នើរដល់សមភាគីខេត្តចាន់បុរី បន្តបង្កើនកិច្ចសហប្រតិបត្តិការក្នុងការធ្វើចរាចរណ៍ផ្លាស់ប្តូរទំនិញឆ្លងកាត់ព្រំដែនរវាងខេត្តទាំង២ឱ្យកាន់តែល្អប្រសើរឡើង ជាពិសេសគឺកសិផល ដែលជាដង្ហើមសេដ្ឋកិច្ចដ៍សំខាន់ ចំពោះប្រជាពលរដ្ឋដែលរស់នៅតាមបណ្តោយព្រំដែន។ ឯកឧត្តម អភិបាលខេត្ត បានមានប្រសាសន៍បញ្ជាក់ថា៖ កន្លងមករដ្ឋបាលខេត្តចាន់បុរី នៃព្រះរាជាណាចក្រថៃ និងខេត្តប៉ៃលិន បានខិតខំពង្រឹងកិច្ចសហប្រតិបត្តិការល្អលើគ្រប់វិស័យ ដើម្បីបម្រើឱ្យផលប្រយោជន៍របស់ប្រជាជន និងប្រទេសទាំងពីរដោយស្មើភាព និងស្មោះត្រង់។ក្នុងឱកាសនោះដែរឯកឧត្តម ផាន់ ចាន់ធុល ក៍បានសំណូមពរដល់ភាគីថៃ ត្រូវបន្តសហប្រតិបត្តិការនូវបញ្ហាមួយចំនួនដូចជា៖ ការពន្លឿនការកសាងស្ពានឆ្លងព្រំដែន បញ្ហាពលករខ្មែរឆ្លងដែនខុសច្បាប់ ព្រមទាំងបទល្មើសឆ្លងដែននានា និងការធ្វើពាណិជកម្មឆ្លងដែនរវាងខេត្តច័ន្ទបុរី-ប៉ៃលិន ជាពិសេសជួយសម្រួលដល់ការនាំចេញស្វាយកែវល្មៀត និងផ្លែមៀនប៉ៃលិនទៅកាន់ប្រទេសថៃអោយបានកាន់ងាយស្រួលនិងមានភាពល្អប្រសើរជាងមុនផងដែរ។
ជាការឆ្លើយតប ឯកឧត្តម វីធូរ៉ាត់ ស្រ៊ីណាម អភិបាលខេត្តច័ន្ទបុរី ព្រះរាជាណាចក្រថៃ បានសន្យាខិតខំពង្រឹងកិច្ចសហប្រតិបត្តិការបន្ថែមទៀត រវាងខេត្តទាំង២ និងខិតខំដោះស្រាយនូវរាល់សំណូមពរ របស់រដ្ឋបាលខេត្តប៉ៃលិន ក្នុងក្របខ័ណ្ឌសមត្ថកិច្ចរបស់ខេត្ត ហើយនឹងនាំយកនូវរាល់សំណូមពរទាំងអស់នេះ ធ្វើការពិភាគ្សាជាមួយមន្ត្រីជំនាញពាក់ព័ន្ធ និងរាជរដ្ឋាភិបាល ដើម្បីរកលទ្ធភាព និងដំណោះស្រាយក្នុងការបង្កើនកិច្ចសហប្រតិបត្តិការរវាងប្រទេសទាំង២ឱ្យបានកាន់តែល្អប្រសើរឡើង។
