(ប៉ៃលិន)៖មានប្រសាសន៍ថ្លែងក្នុងពិធីប្រារព្ធទិវាពិភពលោកលាងសម្អាតដៃ និងទិវាអនាម័យនៅតាមគ្រឹះស្ថានសិក្សា ក្រោមប្រធានបទ «ខ្ញុំឆ្លាត ខ្ញុំលាងដៃនិងសាប៊ូ» នៅសាលាបឋមសិក្សាអូតាពុកក្រោម នាព្រឹកថ្ងៃទី១៣ ខែធ្នូ ឆ្នាំ២០១៩ ឯកឧត្តម ចេង ញ៉ាន់ អភិបាលរងខេត្តប៉ៃលិនបានមានប្រសាសន៍ថា៖ ការអប់រំពីអនាម័យជាប្រចាំ នៅតាមសាលារៀន និងធ្វើឲ្យកុមារមានការផ្លាស់ប្តូរ ទៅរករបៀបរស់នៅ ដែលមានអនាម័យល្អប្រសើរ នៅក្នុងគ្រួសារ សហគមន៍ ក៍ដូចប្រទេសជាតិទាំងមូល ព្រោះថាការអនាម័យជាកត្តាសំខាន់សំរាប់អោយមនុស្សគ្រប់រូប កាត់បន្ថយអត្រាឆ្លងជំងឺផ្សេងៗ ពិសេសកាត់បន្ថយអត្រាមរណភាពរបស់កុមារទាក់ទងនឹងជំងឺរាក ជំងឺរលាកផ្លូវដង្ហើម និង បញ្ហាកង្វះអាហាររូបត្ថម្ភ ដែលតែងតែកើតឡើងចំពោះកុមារ ដោយគ្រាន់តែអនុវត្តវិធីងាយៗគឺការលាងសម្អាតដៃជាមួយនឹងសាប៊ូជាប្រចាំមុនពេលបរិភោគអាហារ និងក្រោយពេលចេញពីបន្ទោបង់ ។ ឯកឧត្តមក៍បានលើកឡើងថា៖កត្តាសន្តិភាពធ្វើអោយប្រទេសជាតិមានការអភិវឌ្ឍន៍លើគ្រប់វិស័យ រួមមាន៖ សាលារៀន ផ្លូវថ្នល់ មន្ទីរពេទ្យ វត្តអារាម ប្រឡាយទឹក ភ្លើងអគ្គីសនី ជាដើម ជាពិសេសផ្តល់ឱកាសដល់សិស្សានុសិស្សសិក្សារៀនសូត្រអោយមានចំនេះ ជំនាញ ដើម្បីប្រែក្លាយខ្លួនជាអ្នកដឹកនាំប្រទេសជាតិអោយមានការរីកចំរើនជាបន្តបន្ទាប់ ដូច្នេះក្មួយៗសិស្សនុសិស្សទាំងអស់ត្រូវយកចិត្តទុកដាក់ខិតខំគាំទ្រ ការពារ អោយបានដាច់ខាត នឹងត្រូវពង្រឹងការថែរក្សាអនាម័យសុខភាពអោយបានរឹងមាំ ទាំងស្មារតី ប្រាជ្ញា របស់ខ្លួនដើម្បីជាស្នូលក្នុងការសិក្សារៀនសូត្រ ឈ្ពោះទៅកាន់ការដឹកនាំប្រទេសជាតិអោយរីកចំរើន តាមរយៈអនុវត្តគោលនយោបាយរបស់រាជរដ្ឋាភិបាលកម្ពុជា ព្រោះថាបើសិនក្មួយៗសិស្សនុសិស្សទាំងអស់មិនបានថែរក្សាអនាម័យជាប្រចាំទេ គឺបណ្តាលអោយប៉ះពាល់ដល់សុខភាពការលូតលាស់រាងកាយ បង្កអោយឆ្លងដង្កូវព្រូន ជំងឺក្រិន ផ្លូវដង្ហើម ខ្វះអាហាររូបត្ថម្ភ អស់កំលាំងស្មារតី ប្រាជ្ញា ផ្សេងៗ ទៀតដែលជាកត្តាមិនអាចក្លាយខ្លួនជាធនធានដឹកនាំអភិវឌ្ឍន៍ប្រទេសជាតិអោយមានការរីកចំរើនឡើយ។
ទន្ទឹមនឹងនេះឯកឧត្តមក៏បានធ្វើការណែនាំឲ្យមន្ត្រីអប់រំ យុវជន និងកីឡាខេត្ត ការិយាល័យអប់រំក្រុង-ស្រុក និងនាយកសាលាទាំងអស់ បន្តជំរុញបំពាក់សម្ភាររូបវន្តផ្នែក អនាម័យដូចជាបង្គន់ បន្ទប់ទឹក កន្លែងលាងសម្អាតដៃ និងប្រពន្ធ័ទឹកស្អាត ឲ្យបានគ្រប់សាលារៀន និងចាត់តាំងឲ្យសិស្សអនុវត្ត ការលាងសម្អាតដៃនៅគ្រប់វេនសិក្សា។ជាមួយគ្នានេះដែរ អាណាព្យាបាល ឬមាតាបិតាសិស្ស ក៏ត្រូវចូលរួមជំរុញកូនចៅរបស់ខ្លួន ឲ្យអនុវត្តការលាងសម្អាតដៃនេះ ឲ្យបានគ្រប់ៗគ្នានៅតាមគ្រួសាររបស់ខ្លួនផងដែរ។
បើតាមការបញ្ជាក់ពីលោក តង់ ធារ៉ា ប្រធានមន្ទីរអប់រំយុវជននិងកីឡា ខេត្តប៉ៃលិនបានអោយដឹងថា៖មន្ទីរអប់រំយុវជននិងកីឡាខេត្តបានជំរុញការងារលេបថ្នាំទម្លាក់ដង្ហូវព្រួនក្នុងមួយឆ្នាំ២ដង ក្នុងខែវិច្ឆិកា និងឧសភា នឹង ជំរុញលើការអនុវត្តសេចក្តីណែនាំលេខ១៨ អយក.សណន ចុះថ្ងៃទី០២ខែឧសភា ឆ្នាំ ២០១៩ស្តីពីការពង្រឹងការអនុវត្តការលើកកម្ពស់សុខភាព សុវត្ថិភាព និងសុខុមាលភាពចំណីអាហារនៅតាមសាលារៀន(បាន៣ឆ្នាំ ក្នុងមួយឆ្នាំ២សាលា សរុប០៦សាលា។សហការជាមួយអង្គការKAEDIT បានជួយកសាងកន្លែងលាងសម្អាតដៃចំនួន៣សាលា និងសហការអង្គការGIZ បើកវគ្គបណ្តុះបណ្តាលគ្រូបង្គោលថ្នាក់ក្រុង ស្រុកស្តីពីស្តង់ដារអប្បបរមាទឹកស្អាត និងអនាម័យតាមសាលារៀន។
