(08-11-2015) ប៉ៃលិន៖ បុណ្យកឋិនទានសាមគ្គីដែលបានផ្តួចផ្តើមឡើងដោយ ឯកឧត្តម កើត សុធា ប្រធានគណបក្សប្រជាជនកម្ពុជាខេត្តប៉ៃលិន លោក ឌិន គឹម ប្រធានក្រុមការងារចុះជួយសង្កាត់ទួលល្វា ឯកឧត្តម ធូភា អនុប្រធានក្រុមការងារ លោកជំទាវ ជា លាភ លោកជំទាវ ស៊ុំ ហៀង លោកស្រី សោម មុន្នីរ័ត្ន ព្រមទាំងពុទ្ធបរិស័ទ្ធមកពីសហរដ្ឋអាមេរិក ខេត្តបាត់ដំបង ព្រះវិហារ និង ពុទ្ធបរិស័ទ្ធចំណុះជើងវត្តបាន ដង្ហែរអង្គកឋិនទានសាមគ្គី ដើម្បីទៅវេប្រគេនដល់ព្រះសង្ឃដែលគង់ចាំព្រះវស្យាអស់ត្រីមាសក្នុងពុទ្ឋសីមារវត្តសន្តិមារាម (ហៅវត្តអូរច្រា) ស្ថិតនៅភូមិអូរច្រា សង្កាត់ទួលល្វា ក្រុងប៉ៃលិន ខេត្តប៉ៃលិន។
ពិធីបុណ្យកឋិនទាននេះបានប្រារព្ធធ្វើឡើងតាមទំនៀមទំលាប់ប្រពៃណីព្រះពុទ្ឋសាសនា ដោយ បាន ជួបជុំពុទ្ធបរស័ទ្ធជិតឆ្ងាយ នៅល្ងាចថ្ងៃទី៧វិច្ឆិកា ឆ្នាំ២០១៥ មានរៀបចំពិធីក្រុងពលី នមសក្កាព្រះរតនត្រៃនិមន្តព្រះសង្ឃចំរើន ព្រះបរិត្ត និងសំដែងធម៍ទេសនា ។ លុះព្រឹកឡើងថ្ងៃទី៨ ខែ វិច្ឆិកាឆ្នាំ២០១៥ អង្គកឋិន បានដង្ហែរប្រទក្សិណជុំវិញព្រះវិហារបីជុំរួចវេរប្រគេនត្រៃជិវរនិងគ្រឿងបរិក្ខា ដល់ព្រះសង្ឃជាកិច្ច បង្ហើយកម្មវិធីបុណ្យ ។
សូមបញ្ជាក់ថាៈបុណ្យកឋិនទានជាពុទ្ធានុញ្ញាត្តិរបស់ព្រះសម្មាសម្ពុទ្ធបរមគ្រូដែលដូនតាយើងបាន បន្សល់ទុកជា កេរ្តិ៍តំណែលតាំងពីយូលង់មកហើយ សម្រាប់អោយកូនចៅជំនាន់ក្រោយ បានគោរព ប្រតិបត្តតាមទំនាមទម្លាប់ជារៀងរហូតមក ដែលកំណត់ក្នុងរដូវកាលបុណ្យកឋិនរយៈពេល២៩ថ្ងៃ។
លោក ឌិន គឹម បានមានប្រសាសន៍ថ្លែងអំណគុណដល់ពុទ្ធបរិស័ទជិតឆ្ងាយដែលបានចូលរួមបុណ្យកឋិនទានពេលនេះក្នុងគោលបំណងលើកស្ទួយវិស័យព្រះពុទ្ធសាសនារបស់ជាតិយើង។លោកបានបន្តថាពិធីបុណ្យកឋិនទាននេះ បានបង្ហាញពីទឹកចិត្ត សាមគ្គីភាព ឯកភាពគ្នា របស់បងប្អូនប្រជាពលរដ្ឋ និង ពុទ្ធបរិស័ទ្ធជិតឆ្ងាយ ដែលបានមកជួបជុំគ្នាធ្វើបុណ្យទានក្នុងបរិយាកាសសប្បាយរីករាយក្រោមមាគ៌ានយោបាយដឹកនាំរបស់សម្តេច តេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជាដែលបានធ្វើអោយប្រទេសជាតិឲ្យមានសុខសន្តិភាពបរិបូរណ៍មួយរយភាគរយ។ បច្ច័យនិងគ្រឿងបរិក្ខាដែលទទួលបានពីអង្គកឋិនទានសាមគ្គីមានចំនួន១៤.២៤០.០០០រៀល (ដប់បួនលានពីររយសែសិបពាន់រៀល) ប្រាក់បាតមានចំនួន ២.២០០បាត និងប្រាក់ដុល្លារមានចំនួន ៥,៩០២ដុល្លារ វេប្រគេនដល់ព្រះសង្ឃសំរាប់ទុកកសាងសមិទ្ធផលនានាក្នុងវត្តបន្តទៀត៕
[youtube id= “hW5ypVK9ZEk”]
