នៅរសៀលថ្ងៃទី០៨ ខែវិច្ឆិកា ឆ្នាំ២០១៩ ដោយមានការចង្អុលបង្ហាញពីឯកឧត្តម ម៉ឹង ពន្លក ប្រធានចលនាយុវជនកម្ពុជា ក១៥៧ លោក យិន សាំងហេង ប្រធានចលនាយុវជនកម្ពុជា ក១៥៧ សាខាខេត្តប៉ៃលិន លោក ជា សុខច័ន្ទដេត អនុប្រធានចលនាយុវជន ក១៥៧ សាខាខេត្តប៉ៃលិន និង លោក តូច ភក្តី ព្រះរាជអាជ្ញាខេត្តប៉ៃលិន បានអញ្ជើញចុះជួបសំណេះសំណាល និងនាំយកអំណោយ ទៅឧបត្ថម្ភដល់កងកម្លាំងប្រដាប់អាវុធទាំង៣ប្រភេទដែលឈរជើង ការពារសន្តិសុខនៅច្រកទ្វារអន្តរជាតិព្រំ ស្ថិតក្នុងភូមិសាស្ត្រភូមិផ្សាព្រំ ក្នុងឃុំស្ទឹងកាច់ ស្រុកសាលាក្រៅ ខេត្តប៉ៃលិន។
លោកឧត្តមសេនីយ៍ទោ សេង សុគន្ធ ស្នងការនគរបាលខេត្តប៉ៃលិន តំណាងឱ្យកងកម្លាំងទាំង៣ប្រភេទបានឱ្យដឹងថា៖ កន្លងមកកងកម្លាំងទាំងអស់ បានខិតខំបំពេញតួនាទីភា រកិច្ច ដែលប្រមុខ រាជរដ្ឋាភិបាល កម្ពុជាប្រគល់ជូន និងយកចិត្តទុកដាក់ពីសុខទុក្ខរបស់ប្រជាពលរដ្ឋ ជាពិសេសរក្សាការពារសុខសុវត្ថិភាព ជូនដល់ប្រជាពលរដ្ឋ និងសង្គមជាតិទាំងមូល ព្រមទាំងចូលរួមរក្សាស្ថិរភាពនយោបាយក្នុងប្រទេស ព្រមទាំងប្តេជ្ញាទប់ស្កាត់រាល់ការប៉ុនប៉ងផ្តួលរំលំរដ្ឋាភិបាលស្របច្បាប់ និងបន្តទប់ស្កាត់រាល់ការប្រមូលផ្តុំមនុស្សបង្កចលាចលគ្រប់រូបភាព ដើម្បីធ្វើបដិវត្តន៍ពណ៌។ លោកស្នងការនគរបាលខេត្តប៉ៃលិនបានបញ្ជាក់បន្ថែមថា៖ កងកម្លាំងទាំងអស់ប្រឆាំងជាដាច់ ខាតនូវល្បិចកលផ្តួលរលំរាជរដ្ឋាភិបាលពីក្រុមឧទ្ទាមក្រៅច្បាប់របស់ទណ្ឌិត សម រង្សី ដែលបានប្រើគ្រប់ល្បិចកលមូលបង្កាច់រាជរដ្ឋាភិបាលនិងការចាក់រុកអោយបរទេសដាក់ទណ្ឌកម្មសេដ្ឋកិច្ចមកលើកម្ពុជាយើង ។ទន្ទឹមនេះកំលាំងប្រដាប់អាវុធទាំងបីប្រភេទបានត្រៀមលក្ខណៈគ្រប់គ្រាន់ដើម្បីប្រឆាំងដាច់ខាតចំពោះជនក្បត់ជាតិ ហើយមានឆន្ទះខ្ពស់និងអនុវត្តន៍នូវបទបញ្ជាអោយបានម៉ឺងម៉ាត់ក្នុងការការពារបូរណភាពទឹកដីនិងការពាររាជរដ្ឋាភិបាលស្របច្បាបយើងផងដែរ។
លោក តូច ភក្តី ព្រះរាជអាជ្ញាខេត្តប៉ៃលិន បានថ្លែងការកោតសរសើរដល់ កងកម្លាំង ប្រដាប់អាវុធទាំង ៣ប្រភេទ ខេត្តប៉ៃលិន ដែលជានិច្ចជាកាល បានបំពេញភារកិច្ច ក្នុងការរក្សាសុវត្ថិភាព សន្តិសុខ សណ្តាប់ធ្នាប់សារធាណ:ជួនប្រជាពលរដ្ឋ និងប្រទេសជាតិ ព្រមទាំងបានចូលរួមចំណែក ក្នុងកិច្ចការមនុស្សធម៌ដល់សង្គមជាតិយ៉ាងច្រើនផងដែរ។ លោកបន្តថាៈរាជរដ្ឋាភិបាលកម្ពុជាក្រោមការដឹកនាំដ៏ឈ្លាសវៃរបស់សម្តេចតេជោ ហ៊ុនសែន នាយករដ្ឋមន្ត្រីនៃព្រះរាជាណាចក្រកម្ពុជាបានធ្វើឱ្យប្រទេសជាតិមានសុខសន្តិភាព មានស្ថិរភាពនយោបាយល្អ ដែលជាហេតុនាំឱ្យប្រទេសជាតិ មានការអភិវឌ្ឍរីកចម្រើនលើគ្រប់វិស័យ ចាប់តាំងពីបាតដៃទទេរហូតមកដូចសព្វថ្ងៃនេះ ។
លោក យិន សាំងហេង ប្រធានចលនាយុវជនកម្ពុជា ក១៥៧ សាខាខេត្តប៉ៃលិន បាននាំការផ្តាំផ្ញើរសាកសួរសុខទុក្ខ ពីសំណាក់ឯកឧត្តម ម៉ឹង ពន្លក ប្រធានចលនាយុវជនកម្ពុជា ក១៥៧ដល់កងកម្លាំងទាំងអស់ក្នុងខេត្តប៉ៃលិន។ លោក យិន សាំងហេង ក៏បានកោតសសើរ ដល់បងៗជាកងកម្លាំងទាំងអស់ ដែលបានលះបង់គ្រប់បែបយ៉ាង ដោយឃ្លាតឆ្ងាយពីក្រុមគ្រួសារ ប្រពន្ធកូន ផ្ទះសំបែង បំពេញភារកិច្ច ទាំងយប់ទាំងថ្ងៃ ដើម្បីរក្សាសុខសុវត្ថិភាព សន្តិភាព ជូនប្រជាពលរដ្ឋ និងប្រទេសជាតិរបស់យើង ហើយបច្ចុប្បន្ននេះ រាជរដ្ឋាភិបាលកម្ពុជា បានខិតខំយកចិត្តទុកដាក់ យ៉ាងខ្លាំង និងគ្រប់កាល:ទេសៈ ក្នុងការលើកកំពស់ជីវភាពរបស់កងកំលាំងប្រដាប់អាវុធទាំងអស់ផងដែរ។
នៅក្នុងឱកាសនោះដែរ លោក យិន សាំងហេង ប្រធានចលនាយុវជនកម្ពុជា ក១៥៧ សាខាខេត្តប៉ៃលិន ព្រមទាំងលោក ជា សុខ ច័ន្ទដេត អនុប្រធានចលនាយុវជន ក១៥៧ សាខាខេត្តប៉ៃលិន តំណាងដ៏ខ្ពង់ខ្ពស់របស់ឯកឧត្តម ម៉ឹង ពន្លក ប្រធានចលនាយុវជនកម្ពុជា ក១៥៧ និងលោក តូច ភក្តី ព្រះរាជអាជ្ញាខេត្តប៉ៃលិន បានឧបត្ថម្ភដល់កងកម្លាំងប្រដាប់អាវុធទាំង ៣ប្រភេទ នៅប្រចាំការនៅច្រកទ្វារអន្តរជាតិច្រកព្រំ រួមមាន៖ ទឹកសុទ្ធចំនួន ៣០០ យួរ ភេសជ្ជៈខារ៉ាបាវចំនួន ០៦ កេស និងថវិកាចំនួន ៣០០ដុល្លារ ផងដែរ។
