ថ្ងៃពុធ ១៤រោច ខែផល្គុន ឆ្នាំច សំរិទ្ធស័ក ព.ស២៥៦២ ត្រុវនឹងថ្ងៃទី០៣ ខែមេសា ឆ្នាំ២០១៩ ឯកឧត្តម ផាន់ ចាន់ធុល អភិបាលខេត្តប៉ៃលិន អមដំណើរដោយថ្នាក់ដឹកនាំ មន្ត្រីរាជការ កងកម្លាំប្រដាប់អាវុធ បានអញ្ជើញចុះពិនិត្យមើលការរៀបចំសណ្តាប់ធ្នាប់ និងការកសាងស្តង់ពិពរណ៌ និងសំណង់នានាជាច្រើនទៀត នៅមាត់ស្ទឹងប៉ៃលិន ចាប់ពីចំនុចស្ពានស្ទឹងតារៀប រហូតដល់ស្ពានសន្តិភាព សម្រាប់ការធ្វើសង្ក្រាន្តប៉ៃលិន ឆ្នាំ២០១៩ ដែលរៀបចំឡើងដោយរដ្ឋបាលខេត្តប៉ៃលិន សហការជាមួយសហភាពសហព័ន្ធយុវជនកម្ពុជាខេត្តប៉ៃលិនដើម្បីអោយប្រជាពលរដ្ឋ ភ្ញៀវទេសចរជាតិ និងអន្តរជាតិមកលេងកម្សាន្តនៅខេត្តប៉ៃលិន ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ។
ឯកឧត្តម ផាន់ ចាន់ធុល អភិបាលខេត្តប៉ៃលិន បានមានប្រសាសន៍ថា៖ នេះជាលើកទី១ សំរាប់ខេត្តប៉ៃលិន ក្នុងការរៀបចំកម្មវិធីសង្ក្រាន្តប៉ៃលិន សំរាប់ឱកាសបុណ្យចូលឆ្នាំថ្មី ប្រពៃណីជាតិខ្មែរ ក្នុងគោលបំណងផ្តល់ឱកាសដល់យុវជន ប្រជាពលរដ្ឋ ភ្ញៀវទេសចរណ៍ជាតិ និងអន្តរជាតិ បានស្វែងយល់នូវភាពសម្បូរបែបនៃវប្បធម៌ អរិយធម៌ ទំនៀមទំលាប់ ប្រពៃណី និងសាសនា របស់ព្រះរាជាណាចក្រកម្ពុជាយើង ព្រមទាំងបន្តពង្រីកកិត្យានុភាពរបស់ជាតិខ្មែរនៅលើឆាកអន្តរជាតិផងដែរ។ សង្រ្កានប៉ៃលិន ក៏រួមចំណែកក្នុងការបំផុសគំនិត ស្មារតីយុវជន ប្រជាជនអោយចេះរួមកម្លាំងគ្នា សាមគ្គីគ្នាជាធ្លុងមួយ ជាគ្រួសារខ្មែរតែមួយ ក្នុងមោទនភាពជាតិខ្មែរ និងស្មារតីអភិរក្ស អភិវឌ្ឍន៍វប្បធម៌ជាតិ អត្តសញ្ញាណជាតិខ្មែរអោយបានគង់វង្ស រីកចំរើនទៅមុខទៀត។ ឯកឧត្តមបានមានប្រសាសន៍បន្តថា៖ សង្ក្រាន្តប៉ៃលិន ឆ្នាំ២០១៩ នេះ នឹងធ្វើឡើងចំនួន ២ទីតាំង ទី១- នៅតាមបណ្តោយដងស្ទឹងប៉ៃលិន ចាប់ពីចំនុចស្ពានស្ទឹងតារៀប រហូតដល់ស្ពានសន្តិភាព និងទី២-ស្ថិតនៅបរិវេណសួនកុមារ មុខសាលាខេត្ត ចាប់ពីថ្ងៃទី១៤ ដល់ ថ្ងៃទី១៦ ខែមេសា ឆ្នាំ២០១៩ ដោយមានការដាក់តាំងបង្ហាញនូវផលិតផល ដែលជាស្នាដៃរបស់ប្រជាពលរដ្ឋខេត្តប៉ៃលិន និងការលេងល្បែងប្រជាប្រិយខ្មែរ ការប្រគុំតន្ត្រីរាំលេងកំសាន្ត ដើម្បីអោយប្រជាពលរដ្ឋ ភ្ញៀវទេសចរណ៍ជាតិ និងអន្តរជាតិអោយមកលេងកំសាន្តសប្បាយរីករាយក្នុងខេត្តប៉ៃលិន។
សូមបញ្ជាក់ថា៖ នៅក្នុងឱកាសបុណ្យចូលឆ្នាំថ្មីប្រពៃណីជាតិខាងមុខ ក្រៅពីការធ្វើសង្ក្រាន្តប៉ៃលិនឆ្នាំថ្មី ខេត្តប៉ៃលិនក៍នៅមានតំបន់ទេសចរណ៍សំខាន់ៗមួយចំនួនទៀត គឺរម្មណីយ៍ដ្ឋានធម្មជាតិចំនួន ៣ រម្មណីយ៍ដ្ឋានកែច្នៃរ ចំនួន ២ កីឡាទេសចរណ៍ ចំនួន ១៦ សណ្ឋាគារ ចំនួន ១១ ផ្ទះសំណាក់ ចំនួន ១៩ និងអាហារដ្ឋាន ចំនួន ៥៩ ដើម្បីទទួលស្វាគមន៍ភ្ញៀវទេសចរណ៍ជាតិ និងអន្តរជាតិ មកស្នាក់នៅ និងលេងកំសាន្ត៕
ដោយ៖ វួច ពឿន
